ന്യൂഡല്‍ഹി: നരേന്ദ്രമോദി സര്‍ക്കാര്‍ അധികാരത്തിലേറിയതിനു ശേഷം ഭീകരവാദക്കേസുമായി ബന്ധപ്പെട്ട് ഇന്ത്യ തിരിച്ചയച്ചത് 26 വിദേശ ഭീകരരെ. ഭീകരവാദക്കേസില്‍ അറസ്റ്റിലായ പ്രതികളില്‍പ്പെട്ട 18 പാകിസ്താനികളെയും എട്ട് അഫ്ഗാനികളെയുമാണ് എന്‍.ഡി.എ സര്‍ക്കാര്‍ തിരിച്ചയച്ചത്. 2014 ജൂണ്‍ മുതലുള്ള കണക്കാണിത്.
ജമ്മുകശ്മിരില്‍ പലപ്പോഴായി അറസ്റ്റ്‌ചെയ്ത ഒന്‍പതു പാകിസ്താനി തീവ്രവാദികളെയും എട്ട് അഫ്ഗാനികളെയുമാണ് 2015ല്‍ തിരിച്ചയച്ചത്. ഈ വര്‍ഷം മുഹമ്മദ് ഹാശിം ഖാന്‍ എന്നയാളെയും തിരിച്ചയച്ചു. ഫെബ്രുവരിയില്‍ വാഗാ അതിര്‍ത്തി മുഖേനയാണ് ഖാനെ നാട്ടിലേക്കു പറഞ്ഞുവിട്ടത്.

ലശ്കര്‍ അംഗമായ ഇദ്ദേഹത്തെ 2008ല്‍ നിയന്ത്രണരേഖ മുറിച്ചുകടക്കുന്നതിനിടെയാണ് പിടികൂടിയത്. ജനുവരിയില്‍ പത്താന്‍കോട്ടിലെ വ്യോമസേനാകേന്ദ്രത്തിനു നേര്‍ക്കുണ്ടായ ആക്രമണത്തില്‍ പ്രതിചേര്‍ക്കപ്പെട്ട ശാഹിദ് ലത്തീഫ് 2010ല്‍ ഇന്ത്യ ഇതുപോലെ തിരിച്ചയച്ച ഭീകരനാണെന്ന് എന്‍.ഐ.എ പറഞ്ഞിരുന്നു.
നിയമവിരുദ്ധമായി ആയുധം കൈവശം വച്ചതുള്‍പ്പെടെയുള്ള കുറ്റങ്ങള്‍ പ്രോസിക്യൂഷന്‍ ഖാനെതിരേ ചുമത്തിയിരുന്നുവെങ്കിലും നടപടിക്രമങ്ങളുടെ അഭാവവും മതിയായ തെളിവും ഇല്ലാത്തതിനാല്‍ കേസ് തള്ളിപ്പോവുകയായിരുന്നു.

അബ്ദുല്‍ ഹാമിദ് ഖാന്‍, മുഹമ്മദ് അയ്യൂബ് ഖാന്‍, മുഹമ്മദ് ഹംസ് ഖാന്‍, അബ്ദുല്‍ ഖാഹിര്‍, ബാസ് മുഹമ്മദ്, ഖൈറുദ്ദീന്‍ ഖാന്‍, സുഹ്‌റബ് ഖാന്‍ തുടങ്ങി ഗുരുതരമായ കുറ്റങ്ങള്‍ ആരോപിക്കപ്പെട്ടവരെയാണ് കഴിഞ്ഞവര്‍ഷം എന്‍.ഡി.എ സര്‍ക്കാര്‍ തിരിച്ചയച്ചത്.
ഇവരെല്ലാം 1997ലാണ് പിടിയിലായത്. നേരത്തെ യു.പി.എ സര്‍ക്കാരിന്റെ കാലത്തും  ഏതാനുംവര്‍ഷം തടവില്‍ കിടന്നവരോ അല്ലെങ്കില്‍ മതിയായ തെളിവുകള്‍ ഇല്ലാത്തവരോ ആയവരെ വിട്ടയച്ചിരുന്നു. എന്നാല്‍, അന്നത്തെ കോണ്‍ഗ്രസ് സര്‍ക്കാരിന്റെ നടപടികളെ ബി.ജെ.പി ശക്തമായി വിമര്‍ശിക്കാറുണ്ടായിരുന്നു.