കരുനാഗപ്പള്ളി: കാര്‍ നിയന്ത്രണം വിട്ട് കടയിലേക്ക് ഇടിച്ചു കയറി കാര്‍ ഓടിച്ചിരുന്ന യുവാവിന് പരിക്ക്. കുലശേഖരപുരം നീലികുളം സ്വദേശി അന്‍സാരി (25)ക്കാണ് പരുക്കേറ്റത്. വെള്ളിയാഴ്ച പുലര്‍ച്ചെ ആറിന് വെളുത്തമണല്‍ ചെട്ടിയത്ത് ജങ്ഷനിലായിരുന്നു അപകടം. ഇയാള്‍ സഹോദരിയുടെ വീട്ടില്‍ പോയി തിരികെ വരുന്നതിനിടെ തലചുറ്റല്‍ അനുഭവപ്പെടുകയും കാര്‍ നിയന്ത്രണം വിട്ട് അടുത്തുള്ള പച്ചക്കറി കടയിലേക്ക് ഇടിച്ചു കയറുകയായിരുന്നു. ഓടിക്കൂടിയവര്‍ പരുക്കേറ്റ അന്‍സാരിയെ പുറത്തെടുക്കുകയും കരുനാഗപ്പള്ളിയിലേ ഒരു സ്വകാര്യ ആശുപത്രിയില്‍ പ്രവേശിപ്പിക്കുകയും ചെയ്തു. യുവാവിന്റെ തോളെല്ല് പൊട്ടുകയും കാലിന് പരുക്കേല്‍ക്കുകയും ചെയ്തു. കാറിന്റെ മുന്‍ഭാഗം പൂര്‍ണമായും തകര്‍ന്നു. കരുനാഗപ്പള്ളി പൊലിസ് കേസെടുത്തു.