ആലക്കോട്: കുളത്തില്‍ നിന്നു മത്സ്യമോഷണം പതിവായതോടെ പരാതിയുമായി കര്‍ഷകന്‍. ആലക്കോട് കുട്ടാപറമ്പ് സ്വദേശി അഞ്ചുകണ്ടത്തില്‍ ജെമിനിയാണ് ആലക്കോട് പൊലിസില്‍ പരാതി നല്‍കിയത്. താമസ സ്ഥലത്ത് നിന്നും അല്‍പ്പം മാറിയുള്ള കൃഷിയിടത്തിലെ കുളത്തില്‍ വര്‍ഷങ്ങളായി മീന്‍ വളര്‍ത്തല്‍ നടത്തുന്നയാളാണ് ജെമിനി. ആഹാരം കൊടുക്കുമ്പോള്‍ സാധാരണയായി കരയുടെ സമീപത്തേക്ക് വരാറുള്ള വലിയ മീനുകളെ കാണാതായതോടെയാണ് മീന്‍ മോഷണം ശ്രദ്ധയില്‍പ്പെട്ടത്. പഞ്ചായത്തില്‍ നിന്നു ലഭിച്ച അയ്യായിരത്തോളം മീനുകള്‍ ഉള്‍പ്പെടെ വ്യത്യസ്ത ഇനങ്ങളില്‍പ്പെട്ട മീനുകള്‍ വില്‍പ്പനക്കായി തയാറായപ്പോഴാണ് മോഷണം പതിവായത്. പരാതി സ്വീകരിച്ച പൊലിസ് അന്വേഷണം തുടങ്ങി.