കണ്ണൂര്‍ സിറ്റി: കണ്ണൂര്‍ കോട്ടയുടെ ചരിത്രം പറയുന്ന ലൈറ്റ് ആന്റ് സൗണ്ട് ഷോയ്ക്ക് തുടക്കം. പിഴവുകള്‍ കണ്ടെത്തി പരിഹരിച്ച് ഷോ സമ്പൂര്‍ണമാക്കാന്‍ പരീക്ഷണ പ്രദര്‍ശനമാണ് കണ്ണൂര്‍ സെന്റ് അഞ്ചലോസ് കോട്ടയില്‍ ആരംഭിച്ചത്. ജൂണ്‍ നാലു വരെ പൊതുജനങ്ങള്‍ക്കായി സൗജന്യ പ്രദര്‍ശനം നടത്തും. ഓഗസ്‌റ്റോടെയായിരിക്കും ടിക്കറ്റ് വച്ചുള്ള പ്രദര്‍ശനം. മലയാളത്തിലും ഇംഗ്ലിഷിലും ഷോ ഒരുക്കിയിട്ടുണ്ട്. തുടക്കത്തില്‍ മലയാളത്തില്‍ മാത്രമായിരിക്കും പ്രദര്‍ശനം.
നിധി തേടിപ്പോകുന്ന രണ്ട് കള്ളന്മാരിലൂടെ ആരംഭിച്ച് സെന്റ് ആഞ്ചലോസ് കോട്ടയുടെ ചരിത്രം മുതല്‍ ആധുനികകാലം വരെയുള്ള കഥയാണ് പ്രദര്‍ശനത്തിലൂടെ വിവരിക്കുന്നത്. സിനിമാതാരം മമ്മൂട്ടിയാണ് ഷോയ്ക്ക് ശബ്ദം നല്‍കുന്നത്. 'ഉറുമി' എന്ന സിനിമയുടെ തിരക്കഥാകൃത്ത് ശങ്കര്‍രാമകൃഷ്ണനാണ് ഷോയ്ക്ക് തിരക്കഥ ഒരുക്കിയത്.
ഉദ്ഘാടന പ്രദര്‍ശനം കഴിഞ്ഞ് ഇന്ത്യയില്‍ എറ്റവും വേഗത്തില്‍ ആരംഭിച്ച ലൈറ്റ് ആന്റ് സൗണ്ട് ഷോയാണ് കണ്ണൂരിലേത്. 3.3 കോടിയാണ് ചെലവ്. ഒരേസമയം 150 പേര്‍ക്കാണ് പ്രവേശനം. ഡി.ടി.പി.സിയും പുരാവസ്തു ഗവേഷണ വകുപ്പും ചേര്‍ന്നാണ് ടിക്കറ്റുനിരക്കും മറ്റും തീരുമാനിക്കുക. വരുമാനത്തിന്റെ നിശ്ചിത ഭാഗം ആര്‍ക്കിയോളജി വിഭാഗത്തിന് നല്‍കേണ്ടിവരും. പരീക്ഷണ പ്രദര്‍ശനം കാണാനുള്ള സൗജന്യ പാസ് വൈകുന്നേരം അഞ്ച് മണിക്ക് കോട്ടയുടെ കവാടത്തില്‍ വിതരണം ചെയ്യും. ലേസര്‍ ലൈറ്റ്, ആനിമേഷന്‍, പ്രത്യേക സൗണ്ട് സിസ്റ്റം എന്നിവ ഉള്‍പ്പെടെ അതിനൂതന സാങ്കേതിക രീതിയോടെയാണ് ഷോ ഒരുക്കിയിരിക്കുന്നത്.