തിരുവനന്തപുരം: തിരുവവന്തപുരം ലോ  അക്കാദമിക്കെതിരായ ആരോപണങ്ങള്‍ അടിസ്ഥാന രഹിതമെന്ന് പ്രിന്‍സിപ്പല്‍ ലക്ഷ്മി നായര്‍. കുട്ടികളെ അസഭ്യം പറയുന്നത് തന്റെ രീതിയല്ലെന്നും അവര്‍ മാധ്യമപ്രവര്‍ത്തകരോട് പറഞ്ഞു. അതേസമയം വാര്‍ത്താസമ്മേളനത്തിനിടെ എ ബി വി പി പ്രതിഷേധവുമായി രംഗത്തെത്തി. 

സംസ്ഥാനമെങ്ങും സ്വാശ്രയകോളജുകള്‍ക്കെതിരായ പ്രതിഷേധംഅലയടിക്കുന്നതിനിടെയാണ് പ്രിന്‍സിപ്പല്‍ ലക്ഷ്മി നായരുടെ രാജി ആവശ്യപ്പെട്ട് ലോ അക്കാദമിയില്‍ വിദ്യാര്‍ഥി സംഘടനകള്‍ ഒന്നടങ്കം രംഗത്തെത്തിയത്. ജാതീയ അധിക്ഷേപം ഉള്‍പ്പടെയുള്ള ഗുരുതരമായ ആരോപണങ്ങളാണ് ഇവര്‍ക്കെതിരില്‍ വിദ്യാര്‍ഥികള്‍ ഉയര്‍ത്തുന്നത്. ലോ അക്കാദമിയിലെ പൂര്‍വ്വ വിദ്യാര്‍ഥികളും ചില എംഎല്‍എമാരും വിദ്യാര്‍ഥികള്‍ക്ക് പിന്‍തുണയുമായി എത്തിയതോടെ സമരം കൂടുതല്‍ ശക്തമായിരിക്കുകയാണ്.
ഹോസ്റ്റലില്‍ എല്ലായിടത്തും കാമറകള്‍ സ്ഥാപിച്ചു വിദ്യാര്‍ഥിനികളുടെ സ്വകാര്യതയെ ഹനിക്കുന്ന പ്രിന്‍സിപ്പല്‍, ജാതിയുടേയും നിറത്തിന്റേയും അടിസ്ഥാനത്തില്‍ അവഹേളിക്കുകയാണെന്ന ഗുരുതരമായ ആരോപണവും വിദ്യാര്‍ഥികള്‍ ഉന്നയിക്കുന്നുണ്ട്. തൃശൂര്‍ നെഹ്രു കോളജില്‍ വിദ്യാര്‍ത്ഥി ആത്മഹത്യ ചെയ്തതിന്റെ അടുത്ത ദിവസങ്ങളിലാണ് തിരുവനന്തപുരം ലോ അക്കാദമിയിലെ അച്ചടക്ക നടപടികളും പീഡനങ്ങളും വാര്‍ത്തയായത്.