കോഴിക്കോട്: നോട്ട് പ്രതിസന്ധികാരണം തുഞ്ചന്‍ സാഹിത്യോത്സവം നടത്താന്‍പോലും ആവശ്യത്തിന് പണമില്ലെന്ന് എം.ടി വാസുദേവന്‍ നായര്‍. തന്നെ സന്ദര്‍ശിക്കാനെത്തിയ സി.പി.എം പൊളിറ്റ്ബ്യൂറോ അംഗം എം.എ ബേബിയുമായുളള സംഭാഷണത്തിനിടെയാണ് എം.ടി ഇക്കാര്യം പറഞ്ഞത്.
സര്‍ക്കാര്‍ പണം അനുവദിച്ചിട്ടും ബാങ്കില്‍ നിന്നും ലഭിക്കുന്നില്ല. പണ്ടൊക്കെയായിരുന്നുവെങ്കില്‍ എവിടുന്നെങ്കിലും കടം വാങ്ങാമായിരുന്നു. എന്നാല്‍ ഇപ്പോള്‍ ആരുടെ കൈയിലും പണമില്ലാത്ത സ്ഥിതിയാണെന്ന് എം.ടി പറഞ്ഞു. സാഹിത്യോത്സവത്തിനുള്ള ഫണ്ടിന്റെ കാര്യത്തില്‍ ഇടപെടാമെന്ന് ഉറപ്പുനല്‍കിയിട്ടാണ് ബേബി മടങ്ങിയത്.
തന്നെപോലുള്ള പൊതുപ്രവര്‍ത്തകര്‍ക്ക് എന്നും ഊര്‍ജമാണ് എം.ടിയെന്ന് ബേബി പിന്നീട് മാധ്യമപ്രവര്‍ത്തകരോടു പറഞ്ഞു.
ലോകമാരാധിക്കുന്ന അദ്ദേഹത്തിന് വിലക്കേര്‍പെടുത്താനാണ് ഇപ്പോള്‍ ശ്രമിക്കുന്നത്. എങ്കിലും നാട്ടുകാരുടെ സ്‌നേഹവും പിന്തുണയും അദ്ദേഹത്തിനുണ്ടെന്നും ബേബി പറഞ്ഞു. സി.പി.എം ജില്ലാ സെക്രട്ടറി പി. മോഹനന്‍, പി. വിശ്വന്‍, ഡി.വൈ.എഫ്.ഐ ദേശീയ ജോ. സെട്ട്രറി പി.എ മുഹമ്മദ് റിയാസ് എന്നിവര്‍ ബേബിയോടൊപ്പമുണ്ടായിരുന്നു. നോട്ടു നിരോധനത്തെ വിമര്‍ശിച്ച് എം.ടിക്കെതിരേ ബി.ജെ.പി രംഗത്തു വന്ന പശ്ചാത്തലത്തിലാണ് എം.എ ബേബി എം.ടിയെ വീട്ടിലെത്തി സന്ദര്‍ശിച്ചത്.