മലപ്പുറം: ജില്ലാ എംപ്ലോയ്‌മെന്റ് എക്‌സ്‌ചേഞ്ചിനോടനുബന്ധിച്ചു തുടങ്ങുന്ന എംപ്ലോയബിലിറ്റി സെന്റര്‍ ഉദ്ഘാടനം നാളെ രാവിലെ 11നു തൊഴില്‍ വകുപ്പ് മന്ത്രി ടി.പി രാമകൃഷ്ണന്‍ ഉദ്ഘാടനം ചെയ്യും. സംസ്ഥാനത്തെ ജില്ലാ കേന്ദ്രങ്ങളില്‍ തുടങ്ങുന്ന ഒന്‍പതാമത്തെ കേന്ദ്രമാണ് മലപ്പുറത്തു തുടക്കംകുറിക്കുന്നത്.
സര്‍ക്കാര്‍ മേഖലയിലെ വിവിധ തൊഴിലവസരങ്ങള്‍ പരിചയപ്പെടുത്തുന്നതിനു പുറമേ സ്വകാര്യ മേഖലയിലെ തൊഴിലവസരങ്ങള്‍ പരിചയപ്പെടുത്തിനുകൂടിയാണ് എംപ്ലോയബിലിറ്റി സെന്റര്‍ പ്രവര്‍ത്തിക്കുന്നത്്. ഇതിന്റെ ഭാഗമായി ജില്ലയിലെ ഉദ്യോഗാര്‍ഥികള്‍ക്കു തൊഴിലവസരങ്ങള്‍ അറിയാന്‍ മുന്‍കൂട്ടി രജിസ്റ്റര്‍ ചെയ്യാന്‍ അവസരമുണ്ട്. ഉദ്യോഗാര്‍ഥികളെ ആവശ്യമുള്ള സ്വകാര്യ സ്ഥാപനങ്ങള്‍ക്കും എംപ്ലോയബിലിറ്റി സെന്റര്‍വഴി രജിസ്റ്റര്‍ ചെയ്യാം. എംപ്ലോയബിലിറ്റി സെന്റര്‍വഴി പരിശീലനം പൂര്‍ത്തിയാക്കിയ ഉദ്യോഗാര്‍ഥികളെ വിവിധ സ്വകാര്യ സ്ഥാപനങ്ങള്‍ക്കു നാമനിര്‍ദേശം ചെയ്യാനും പുതിയ സംവിധാനത്തിലൂടെ സാധിക്കും.
തൊഴിലവസരങ്ങള്‍ പരിചയപ്പെടുത്താന്‍ കേന്ദ്രംവഴി മാസംതോറും മിനി ജോബ് ഡ്രൈവുകളും വര്‍ഷത്തിലൊരിക്കല്‍ മെഗാ ജോബ് ഫെസ്റ്റും സംഘടിപ്പിക്കും. ജില്ലാപഞ്ചായത്ത് ഹാളിലാണ് ഉദ്ഘാടന പരിപാടി നടക്കുന്നത്. വാര്‍ത്താസമ്മേളനത്തില്‍ ഭാരവാഹികളായ മോഹന്‍ ലൂക്കോസ്, കെ. അജേഷ്, കെ. ശൈലേഷ്, ടി. അമ്മാര്‍ പങ്കെടുത്തു.