രാജാക്കാട്: ഹൈറേഞ്ച് മേഖലയില്‍ ശക്തമായ കാറ്റ്. വിവിധയിടങ്ങളില്‍ മരം വീണ് അപകടങ്ങളുണ്ടായി. രാജാക്കാട് വാക്കാസിറ്റിയ്ക്ക് സമീപം ഓട്ടോറിക്ഷയ്ക്ക് മുകളിലേയ്ക്ക് മരം വീണ് ഡ്രൈവര്‍ക്ക് പരുക്കേറ്റു. പരപ്പനങ്ങാടിയില്‍ വീടിന് മുകളിലേയ്ക്ക മരം വീണു. രാജാക്കാട് നിന്നും മാങ്ങാത്തൊട്ടിയിക്ക് ഓട്ടം പോകുകയായിരുന്ന ആത്മാവ്‌സിറ്റി സ്വദേശി കയ്യാലപറമ്പില്‍ സന്തോഷിന്റെ ഓട്ടോയ്ക്ക് മുകളിലേയ്ക്ക് മരം വീഴികയായിരുന്നു. മുന്‍ഭാഗത്ത് അടിച്ച് വീണതിനെതുടര്‍ന്ന് ഓട്ടോ റോഡില്‍ മറിഞ്ഞു.
പരുക്കേറ്റ സന്തോഷിനെ ആശുപത്രിയില്‍ പ്രവേശിപ്പിച്ചു. സന്തോഷിന്റെ സഹോദരന്‍ അജി ആറുവര്‍ഷം മുമ്പ് ഓട്ടോയുമായി പോകുന്നതിനിടയില്‍ ഇത്തരത്തില്‍മരം വീണ് കാലുകള്‍ തളര്‍ന്ന് കിടപ്പിലാണ്. രാജാക്കാട് എസ് .എസ് .എം കോളജിന്റെ ബസ്സ് മറികടന്ന് തൊട്ടുപുറകേയാണ് മരം വീണത്. ഓട്ടോ അപകടത്തില്‍പ്പെടുന്നത് കണ്ട് ബസില്‍ നിന്നും ഇറങ്ങിവന്ന കോളജ് വിദ്യാര്‍ഥികളാണ് ഓട്ടോ ഉയര്‍ത്തി സന്തോഷിനെ ആശുപത്രിയില്‍ എത്തിച്ചത്. മുഖത്തും കാലിനും പരിക്കേറ്റ ഇദേഹത്തെ രാജാക്കാട് സ്ന്റ് ജോണ്‍സ് ആശുപത്രിയില്‍ പ്രാഥമിക ചികിത്സ നല്‍കിയതിന് ശേഷം അടിമാലി താലൂക്ക് ആശുപത്രിയിലേക്ക് മാറ്റി.
രാജാക്കാട് പരപ്പനങ്ങാടി കിഴക്കേപ്പറമ്പില്‍ മുരളിയുടെ വീടിന് മുകളിയേക്ക് സമീപത്ത് നിന്ന മരം ഒടിഞ്ഞ് വീണ് വീടിന്റെ ഷീറ്റുകള്‍ തകര്‍ന്നു. മുരളിയുടെ ഭാര്യയും മക്കളും വീടിനുള്ളില്‍ ഉള്ള സമയത്താണ് മരം വീഴുന്നത്. വലിയ ശബ്ദം കേട്ട് ഇവര്‍ വീടിന് പുറത്തേയ്ക്ക് ഇറങ്ങി ഓടി രക്ഷപ്പെടുകയായിരുന്നു. സമീപവാസികള്‍ എത്തി മരം വെട്ടി നീക്കി.