ഹൈദരാബാദ്: സമൂഹമാധ്യമമായ ഇന്‍സ്റ്റഗ്രാം വഴി കഞ്ചാവ് അടങ്ങിയ ചോക്ലേറ്റ് വിറ്റ യുവ ഡോക്ടറെ പൊലിസ് അറസ്റ്റ് ചെയ്തു. ന്യൂറോളജിസ്റ്റായ മുഹമ്മദ് സുജത് അലിഖാനെയാണ് പൊലിസ് ബഹാദൂര്‍പുരയില്‍ നിന്നും അറസ്റ്റ് ചെയ്തത്.

കഞ്ചാവ് ചേര്‍ത്തുണ്ടാക്കിയ ചോക്ലേറ്റ് ഇദ്ദേഹം തന്റെ ഇന്‍സ്റ്റഗ്രാം അക്കൗണ്ടിലൂടെ വില്‍പ്പന നടത്തിവരികയായിരുന്നു. ഇതേ കുറിച്ച് വിവരം ലഭിച്ച പ്രത്യേക അന്വേഷണ സംഘമാണ് ഇയാളെ കസ്റ്റഡിയിലെടുത്തത്. 45 ചോക്ലേറ്റുകള്‍ അടങ്ങുന്ന പെട്ടിയും ഇയാളില്‍ നിന്ന് പിടിച്ചെടുത്തിട്ടുണ്ട്.

ഒരു ചോക്ലേറ്റിന് 500 രൂപ മുതല്‍ 1800 രൂപ വരെ ഈടാക്കിയിരുന്നു. കഞ്ചാവിന്റെ വീര്യത്തിനനുസരിച്ച് അതിന് X,XX,XXX,4X,5X,6X എന്നിങ്ങനെ പേരുകളിട്ടു. പ്രതിമാസം 40000 നും 60000 നും ഇടയില്‍ ഇയാള്‍ ഈ കച്ചവടം വഴി സമ്പാദിച്ചിരുന്നു. ആവശ്യക്കാര്‍ ഇദ്ദേഹത്തെ ഫോണില്‍ ബന്ധപ്പെടുകയും ഉത്പന്നങ്ങള്‍ കൊറിയര്‍ വഴി എത്തിച്ചുകൊടുക്കുകയുമാണ് ചെയ്തിരുന്നത്. പണമിടപാടുകള്‍ ഇന്റെര്‍നെറ്റ് ബാങ്കിങ് വഴിയാണണ് നടത്തിയിരുന്നത്.

വീഡിയോകള്‍ കണ്ടാണ് ചോക്ലേറ്റുകള്‍ നിര്‍മിക്കുന്ന രീതി ഇദ്ദേഹം മനസിലാക്കിയത് പിന്നീട് കഞ്ചാവ് ചോക്ലറ്റ് മിശ്രിതത്തില്‍ ചേര്‍ത്ത് വിവിധ നിറങ്ങളിലുള്ള ഉത്പന്നങ്ങള്‍ ഉണ്ടാക്കി. രാജ്യത്തെ വിവിധയിടങ്ങളില്‍ ചോക്ലേറ്റിന് ആവശ്യക്കാരുണ്ടായിരുന്നു.