തലശ്ശേരി: ധര്‍മ്മടം അണ്ടലൂര്‍ മുല്ലപ്രം കാവിന് സമീപം ചോമന്റവിടെ സന്തോഷ്‌കുമാറി(52) നെ വീട്ടില്‍ കയറി വെട്ടിക്കൊലപ്പെടുത്താനുപയോഗിച്ച ആയുധങ്ങള്‍ പൊലിസ് കണ്ടെടുത്തു.
വാള്‍, കത്തി, മരക്കഷ്ണം എന്നിവയാണ് പ്രതികള്‍ നല്‍കിയ സൂചനയെ തുടര്‍ന്ന് നടത്തിയ പരിശോധനയില്‍ കണ്ടെടുത്തത്. അന്വേഷണ ഉദ്യോഗസ്ഥനായ പാനൂര്‍ സി.ഐ കെ.എസ് ഷാജിയുടെ നേതൃത്വത്തില്‍ കസ്റ്റഡിയില്‍ വാങ്ങിയ പ്രതികളെ കൂടുതല്‍ ചോദ്യം ചെയ്തു. സന്തോഷ്‌കുമറിന്റെ വീടിന് സമീപം ഉപേക്ഷിച്ച നിലയിലായിരുന്നു ആയുധങ്ങള്‍.
മൂന്ന് ദിവസത്തേക്ക് കസ്റ്റഡിയില്‍ വിട്ടുകിട്ടിയ പ്രതികളെ കസ്റ്റഡി കാലാവധി കഴിഞ്ഞതിനാല്‍ ഇന്നലെ തലശ്ശേരി ജുഡീഷ്യല്‍ ഫസ്റ്റ് ക്ലാസ് മജിസട്രേറ്റ് കോടതിയില്‍ ഹാജരാക്കി വീണ്ടും റിമാന്‍ഡ് ചെയ്തു. കേസിലെ പ്രധാന പ്രതിയായ അപ്പുവിനെ ഇനിയും കണ്ടെത്താനായിട്ടില്ല.
ജനുവരി 18ന് രാത്രിയാണ് വീട്ടിലെത്തിയ അക്രമി സംഘം സന്തോഷ്‌കുമാറിനെ വെട്ടിക്കൊലപ്പെടുത്തിയത്.