പട്ടിക്കാട്: കരുവംപാറയില്‍ ബസും കാറും കൂട്ടിയിടിച്ച് കാര്‍ യാത്രികര്‍ക്കു പരുക്കേറ്റു. നിലമ്പൂര്‍-പെരുമ്പിലാവ് സംസ്ഥാനപാതയില്‍ താഴെ പൂപ്പലം മത്സ്യ മൊത്തവിതരണ മാര്‍ക്കറ്റിനു സമീപം കഴിഞ്ഞദിവസം വൈകിട്ട് നാലോടെയാണ് അപകടം.
നിലമ്പൂരില്‍നിന്നു പെരിന്തല്‍മണ്ണയിലേക്കു വരികയായിരുന്ന സ്വകാര്യബസും എതിരേവന്ന കാറും കൂട്ടിയിടിക്കുകയായിരുന്നു. വാണിയമ്പലം സ്വദേശികളായ മൂന്നു പേരാണ് കാറിലുണ്ടായിരുന്നത്. ഇവരെ പരുക്കുകളോടെ പെരിന്തല്‍മണ്ണയിലെ സ്വകാര്യ ആശുപത്രിയില്‍  പ്രവേശിപ്പിച്ചു. ഇടിയുടെ ആഘാതത്തില്‍ കാറിന്റെ മുന്‍ഭാഗം പൂര്‍ണമായും തകര്‍ന്നു. കാര്‍ ഡ്രൈവറുടെ അശ്രദ്ധയാണ് അപകടത്തിനു കാരണമായതെന്ന് ദൃസാക്ഷികള്‍ പറഞ്ഞു.