തിരുവനന്തപുരം: ലോ അക്കാദമി വിഷയത്തില്‍ കെ.എസ്.യു നടത്തിയ സെക്രട്ടറിയേറ്റ് മാര്‍ച്ചില്‍ സംഘര്‍ഷം. പൊലിസ് മര്‍ദ്ദനത്തില്‍ ലോ കോളജ് വിദ്യാര്‍ഥിക്ക് ഗുരുതരമായി പരുക്കേറ്റു. പാറശ്ശാല സ്വദേശി ഉണ്ണികൃഷ്ണന്‍ പോറ്റിക്കാണ് പരുക്കേറ്റത്. ഇയാളെ തിരുവനന്തപുരം മെഡിക്കല്‍ കോളജില്‍ പ്രവേശിപ്പിച്ചിരിക്കുകയാണ്. പോറ്റിയെ പൊലിസ് വളഞ്ഞിട്ട് മര്‍ദ്ദിക്കുകയായിരുന്നുവെന്നാണ് റിപ്പോര്‍ട്ട്.

പ്രവര്‍ത്തകര്‍ ബാരിക്കേഡ് മറികടന്ന് മുന്നേറാന്‍ ശ്രമിച്ചതോടെയാണ് പൊലിസ് ലാത്തിവീശിയത്. പൊലിസിന് നേരെ കല്ലേറുണ്ടായി. ലാത്തിയടിയില്‍ നിരവധി പ്രവര്‍ത്തകര്‍ക്ക് പരിക്കേറ്റിട്ടുണ്ട്. പിരിഞ്ഞുപോയ പ്രവര്‍ത്തകര്‍ വീണ്ടും സംഘടിച്ചെത്തിയെങ്കിലും പൊലിസ് ഇവരെ വിരട്ടിയോടിക്കുകയായിരുന്നു. കെ.എസ്.യു ജില്ലാ പ്രസിഡന്റിന്റെ നേതൃത്വത്തിലായിരുന്നു മാര്‍ച്ച് നടന്നത്.