റിയാദ്: അമേരിക്കയില്‍ കൂടുതല്‍ നിക്ഷേപം ഇറക്കുമെന്ന് സഊദി ഊര്‍ജ മന്ത്രി എഞ്ചിനീയര്‍ ഖാലിദ് അല്‍ഫാലിഹ് വ്യക്തമാക്കി.

പെട്രോള്‍, ഗ്യാസ് മേഖലയിലും റിഫൈനറി, ഇന്ധന വിതരണം എന്നീ മേഖലയിലുമാണ് മുതല്‍ മുടക്കാന്‍ ഉദ്ദേശിക്കുന്നത്. എന്നാല്‍ ട്രംപിന്റെ സാമ്പത്തിക നയതിനനുസരിച്ചു മാത്രമേ ഇത് നടപ്പിലാകുകയുള്ളൂവെന്നും അദ്ദേഹം പറഞ്ഞു.

അമേരിക്കയിലെ റിഫൈനറി, ഇന്ധന വിതരണം എന്നീ മേഖലയില്‍ സഊദി നിലവില്‍ നിക്ഷേപം നടത്തിട്ടുണ്ട്. എന്നാല്‍ ഈ മേഖലയില്‍ കൂടുതല്‍ നിക്ഷേപമിറക്കാണ് നീക്കം.  അമേരിക്കയുടെ വര്‍ധിച്ചു വരുന്ന ഊര്‍ജ്ജ ആവശ്യത്തിനനുസരിച്ച് പെട്രോളിയം ഉല്‍പന്നങ്ങളും ഗ്യാസും നല്‍കാന്‍ ലോകത്തിലെ ഏറ്റവും വലിയ എണ്ണ ഉല്‍പാദന രാജ്യമായ സഊദി സജ്ജമാണെന്നും ഖാലിദ് അല്‍ഫാലിഹ് കൂട്ടിച്ചേര്‍ത്തു.

എണ്ണ ഉല്‍പാദന രാജ്യങ്ങളുടെ കൂട്ടായ്മയായ ഒപെക് നവംബര്‍ 30ന് വിയന്ന ഉച്ചകോടിയില്‍ എടുത്ത ഉല്‍പാദന നിയന്ത്രണവുമായി ബന്ധപ്പെട്ട തീരുമാനം അമേരിക്കയുമായി ചര്‍ച്ച ചെയ്യാന്‍ സഊദി  തയാറാണെന്നും മന്ത്രി പറഞ്ഞു.