മഞ്ചേരി: സംസ്ഥാനത്തെ തൊഴില്‍ പ്രശ്‌നങ്ങള്‍ പരിഹരിക്കാന്‍ മുഖ്യമന്ത്രി ഇടപെടണമെന്ന് ഐ.എന്‍.ടി.യു.സി സംസ്ഥാന പ്രസിഡന്റ് ആര്‍. ചന്ദ്രശേഖരന്‍ പത്രസമ്മേളനത്തില്‍ ആവശ്യപ്പെട്ടു. തൊഴില്‍ പ്രശ്‌നങ്ങള്‍ മുമ്പെങ്ങുമില്ലാത്ത വിധം വര്‍ധിച്ചുവരികയാണ്. വിവിധ ട്രെയ്ഡ് യൂനിയനുകളെ വിളിച്ചു ചേര്‍ത്ത് അഭിപ്രായം ആരാഞ്ഞ് മുന്നോട്ടുപോയാല്‍ പരിഹരിക്കാവുന്നതേയുള്ളു നിലവിലെ പ്രതിസന്ധികള്‍. ബജറ്റില്‍ അടിസ്ഥാന തൊഴിലാളി വര്‍ഗത്തിനനുകൂലമായ യാതൊരു പ്രഖ്യാപനങ്ങളുമില്ലന്നത് മോദി സര്‍ക്കാറിന്റെ തൊഴിലാളികളോടുള്ള സമീപനം വ്യക്തമാക്കിയിരിക്കുകയാണ്. സാമ്പത്തിക രംഗത്തെ ഡിജിറ്റലൈസ് ചെയ്യുക എന്നതു മുതല്‍ തുടങ്ങുന്നു തൊഴിലാളികള്‍ക്കുമേലുള്ള പ്രയാസപ്പെടുത്തലുകള്‍. പുരോഗതിക്ക് ഐ.എന്‍.ടി.യു.സി എതിരല്ല, എന്നാല്‍ അതിനൊരു മനുഷ്യത്വപരമായ മുഖംവേണം. പുതിയ തൊഴില്‍ അവസരങ്ങള്‍ സൃഷ്ടിക്കുമെന്നു പറഞ്ഞ മോദി സര്‍ക്കാര്‍ അവസരങ്ങള്‍ ഉണ്ടാക്കിയില്ലന്നു മാത്രമല്ല ഉള്ള സാധ്യതകളെപോലും ഉപയോഗപ്പെടുത്തിയില്ലന്നതാണ് വസ്തുത. പുതിയ കറന്‍സി നയം കാരണം തൊഴിലില്ലായ്മ പെരുകാനും ബാങ്കുകള്‍ തകരാനും ഇടയാക്കിയിരിക്കുകയാണ്. അതിനാല്‍ അടിയന്തിരമായി ഈ നയം പുനപരിശോധിക്കണം. രാജ്യത്ത് തൊഴിലെടുക്കുന്നവര്‍ക്ക് അതിന്റെ പങ്ക് ആശ്വാസ വേതന പദ്ധതിയായി വിതരണം ചെയ്യണമെന്നും ജനങ്ങള്‍ക്ക് ആവശ്യമാകുന്ന ഭരണ രീതിയിലേക്ക് പ്രായോഗികമായി ചിന്തിക്കാന്‍ കേന്ദ്ര-സംസ്ഥാന സര്‍ക്കാറുകള്‍ തയ്യാറാവണമെന്നും അദ്ദേഹം പറഞ്ഞു. ഐ.എന്‍.ടി.യു.സി നേതാക്കളായ എന്‍.എ കരീം, വി.പി ഫിറോസ് എന്നിവരും പത്രസമ്മേളനത്തില്‍ പങ്കെടുത്തു.