കൂത്തുപറമ്പ്: ചിറ്റാരിപ്പറമ്പ് വട്ടോളിയില്‍ വീടിനോട് ചേര്‍ന്ന കെട്ടിടത്തിന് തീ പിടിച്ചു. വട്ടോളിയിലെ കുഞ്ഞോളത്തില്ലത്ത് ഉണ്ണികൃഷ്ണന്‍ നമ്പൂതിരിയുടെ ഉടമസ്ഥതയിലുള്ള കെട്ടിടത്തിനാണ് തീ പിടിച്ചത്.
ഇന്നലെ വൈകുന്നേരം മൂന്നരയോടെയാണ് സംഭവം. മുറിക്കകത്തു സൂക്ഷിച്ചിരുന്ന റബര്‍ഷീറ്റ്, അടക്ക, കുരുമുളക്, തേങ്ങ തുടങ്ങിയവ പൂര്‍ണമായും കത്തിനശിച്ചു. ഇതിനിടെ ഇതിനകത്തുണ്ടായിരുന്ന ഗ്യാസ് സിലിണ്ടര്‍ പൊട്ടിത്തെറിച്ചത് പരിഭ്രാന്തി പരത്തി.
പഴയ വീട് പൊളിച്ചുനീക്കുമ്പോള്‍ സാധനങ്ങളും മറ്റും സൂക്ഷിക്കാനായി പൊളിക്കാതെ നിലനിര്‍ത്തിയതായിരുന്നു ഈ കെട്ടിടം. കൂത്തുപറമ്പില്‍ നിന്നു എത്തിയ രണ്ട് യൂണിറ്റ് ഫയര്‍ഫോഴ്‌സും നാട്ടുകാരും ചേര്‍ന്നാണ് മണിക്കൂറുകളോളം നീണ്ട പ്രയത്‌നത്തിലൊടുവിലാണ് തീ അണച്ചത്.