കാസര്‍കോട്: ബൈക്കുകള്‍ കൂട്ടിയിടിച്ച് ഗുരുതരമായി പരുക്കേറ്റു ചികിത്സയില്‍ കഴിയുകയായിരുന്ന വിദ്യാര്‍ഥി മരിച്ചു. കൊല്ലമ്പാടി ജുമാ മസ്ജിദിനു സമീപത്തെ അബ്ദുല്‍ ഹമീദ്,ആയിഷ എന്നിവരുടെ മകന്‍ സത്താര്‍ (16) ആണ് മരിച്ചത്.

ഇക്കഴിഞ്ഞ ശനിയാഴ്ച രാത്രി 12 ഓടെയാണ് ബേക്കല്‍ പാലക്കുന്നില്‍ വച്ച് സത്താര്‍ സഞ്ചരിച്ചിരുന്ന ബൈക്കില്‍ എതിരെ നിന്നും വരുകയായിരുന്ന ബൈക്ക് ഇടിച്ചത്. ബൈക്കില്‍ പിറകിലിരിക്കുകയായിരുന്നു സത്താര്‍.

ആലംപാടി ഗവ.ഹയര്‍ സെക്കന്ററി സ്‌കൂളിലെ പ്ലസ് ടു വിദ്യാര്‍ഥിയാണ്. ബൈക്കോടിച്ചിരുന്ന കൊല്ലംപാടിയിലെ ഇജാസിനും അപകടത്തില്‍ പരുക്കേറ്റിരുന്നു. മംഗളൂരുവിലെ ആശുപത്രിയില്‍ ചികിത്സയില്‍ കഴിയുകയായിരുന്ന സത്താര്‍ ഇന്നലെയാണ് മരിച്ചത്. സഹോദരങ്ങള്‍: അഷ്‌റഫ്,സിദ്ധീഖ്,മുഷ്താഖ്,സഫീറ.