25 വര്‍ഷത്തെ സജീവ നാടക പ്രവര്‍ത്തനം, കേരളമൊട്ടുക്കും നാടകാവതരണങ്ങള്‍, ജില്ലാസംസ്ഥാന നാടക അവാര്‍ഡുകള്‍ നിരവധി. ഇതൊക്കെ എന്ത് ? പതിനഞ്ച് വര്‍ഷത്തോളം കലോത്സവ വേദികളില്‍ മോണോആക്ടിലെയും ചിത്രകലയിലെയും സ്ഥിര ഗുരു പ്രതിഷ്ഠയാണ് കോഴിക്കാട് പേരാമ്പ്ര സ്വദേശിയായ സത്യന്‍ മുദ്ര. വര്‍ഷാവര്‍ഷം പത്തും പതിനഞ്ചും ശിഷ്യഗണങ്ങളാണ് സംസ്ഥാന സ്‌കൂള്‍ കലോത്സവത്തില്‍ സത്യന്റെ മുദ്രകളിലൂടെ എ ഗ്രേഡ് സ്വന്തമാക്കി വേദി വിടുന്നത്. മോണോ ആക്ടിലെ സത്യന്റെ വിഷയങ്ങള്‍ സഞ്ചരിക്കുന്നത് ആരും പോകാന്‍ മടിക്കുന്ന വഴികളിലൂടെയാണ്. സഫ്ദര്‍ ഹാഷ്മി, കെവിന്‍ കാര്‍ട്ടര്‍, പൊമ്പിളൈ ഒരുമൈ തുടങ്ങി ചവിട്ടുന്ന കല്ലിലെല്ലാം പതിഞ്ഞിട്ടുണ്ടാകും സത്യന്റെ പാദമുദ്ര. ഇരിങ്ങന്നൂര്‍ യു.പി സ്‌കൂളിലെ ചിത്രകലാധ്യാപകനായ സത്യന്‍ തിരക്കിലാണ്, കല കൈവിടാത്ത കലയെ കൈ വിടാത്ത യുവത്വത്തിനായുള്ള തിരക്കില്‍.