കൊച്ചി: ജനതാദള്‍(യു) കേരള ഘടകം എല്‍.ഡി.എഫിലേക്ക് പോകാന്‍ സംസ്ഥാന കൗണ്‍സില്‍ തീരുമാനിച്ചെന്ന എം.പി വീരേന്ദ്രകുമാറിന്റെ പ്രഖ്യാപനം പാര്‍ട്ടിയിലെ ബഹുഭൂരിപക്ഷം പ്രവര്‍ത്തകരുടെയും അഭിപ്രായത്തിന് എതിരാണെന്ന് മുന്‍ സംസ്ഥാന സെക്രട്ടറി ജോണ്‍ ജോണ്‍ വാര്‍ത്താസമ്മേളനത്തില്‍ പറഞ്ഞു.
ഭൂരിപക്ഷം മണ്ഡലം പ്രസിഡന്റുമാരും കമ്മിറ്റികളും ഈ തീരുമാനത്തില്‍ വിയോജിപ്പ് പ്രകടിപ്പിച്ചിരുന്നു. മുന്നണിമാറ്റം അജന്‍ഡയില്‍ ഉള്‍പ്പെടുത്താതെയാണ് സംസ്ഥാന കമ്മിറ്റിയും കൗണ്‍സിലും ചേര്‍ന്നത്. സുപ്രധാന തീരുമാനം എടുക്കുന്നതിനുമുന്‍പ് ജില്ലാകൗണ്‍സിലുകള്‍ വിളിച്ചുചേര്‍ത്ത് അഭിപ്രായം തേടണമെന്ന് ഭൂരിപക്ഷം മണ്ഡലം കമ്മിറ്റികളും ആവശ്യപ്പെട്ടിരുന്നു. ഇടതു മുന്നണി പ്രവേശന തീരുമാനത്തിന് എതിരായ പാര്‍ട്ടി നേതാക്കളും പ്രവര്‍ത്തകരും യഥാര്‍ഥ ജനതാദള്‍ ചേരി രൂപീകരിക്കും. എല്ലാ ജില്ലകളിലും ഒരാഴ്ചക്കുള്ളില്‍ കമ്മിറ്റികള്‍ രൂപീകരിക്കും. 26ന് എറണാകുളത്ത് പ്രവര്‍ത്തകരുടെ യോഗം ചേരുമെന്നും ജോണ്‍ ജോണ്‍ പറഞ്ഞു.