ബംഗളൂരു: കര്‍ണാടക തെരഞ്ഞെടുപ്പില്‍ സ്വീകരിക്കേണ്ട രാഷ്ട്രീയ തന്ത്രങ്ങളെക്കുറിച്ച് മുഖ്യമന്ത്രി സിദ്ധരാമയ്യയുമായി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ചര്‍ച്ച നടത്തി. ഗുജറാത്തില്‍ സ്വീകരിച്ച അതേ തന്ത്രങ്ങളാണ് കര്‍ണാടകയിലും സ്വീകരിക്കുന്നതെങ്കില്‍ അവിടെ പാര്‍ട്ടിക്ക് നേരിട്ട തിരിച്ചടികള്‍ കര്‍ണാടകയില്‍ ആവര്‍ത്തിക്കാതിരിക്കാനുള്ള മുന്‍കരുതല്‍ ഉണ്ടാകണമെന്നാണ് ഇരുവരും നടത്തിയ ചര്‍ച്ചയില്‍ തീരുമാനമായത്.
എന്നിരുന്നാലും ബി.ജെ.പിക്കെതിരായി ഗുജറാത്തില്‍ സ്വീകരിച്ചതെന്തെല്ലാമാണോ അതേ രീതിയില്‍ പ്രവര്‍ത്തിക്കണമെന്ന് രാഹുല്‍ ഗാന്ധി കര്‍ണാടകയിലെ കോണ്‍ഗ്രസ് നേതൃത്വത്തോട് ആവശ്യപ്പെട്ടിട്ടുണ്ട്.
സംസ്ഥാനത്തെ എല്ലാ സമുദായക്കാരേയും തുല്യരീതിയില്‍ പരിഗണിക്കാന്‍ തയാറാകണമെന്ന് രാഹുല്‍ നേതാക്കളെ ഓര്‍മിപ്പിച്ചിട്ടുണ്ട്. ഗുജറാത്ത് തെരഞ്ഞെടുപ്പ് പ്രചാരണത്തിനിടയില്‍ മണിശങ്കര്‍ അയ്യരെപോലുള്ളവരുടെ അഭിപ്രായ പ്രകടനങ്ങള്‍ കര്‍ണാടക തെരഞ്ഞെടുപ്പ് പ്രചാരണത്തിനിടയില്‍ ഉണ്ടാകരുത്. സംസ്ഥാനത്ത് മോദിയും-അമിത് ഷായും തമ്മിലുള്ള കൂട്ടുകെട്ടിന്റെ പ്രവര്‍ത്തനത്തെ തടയിടാന്‍ ശക്തമായ രീതിയിലുള്ള പ്രവര്‍ത്തനം കാഴ്ച വയ്ക്കണമെന്നും രാഹുല്‍ മുഖ്യമന്ത്രി സിദ്ധരമായ്യയെ ഓര്‍മിപ്പിച്ചു.