പുലാമന്തോള്‍: വളപുരത്തും കുരുവമ്പലത്തും വളര്‍ത്തു നായയുടെ കടിയേറ്റ് നിരവധി പേര്‍ക്ക് പരുക്ക്. ഇന്നലെ വൈകീട്ട് ആറോടെ വളപുരം കാവുവട്ടത്തെ ഒരു വീട്ടില്‍ നിന്നും പുറത്തു ചാടിയ വളര്‍ത്തുനായ സമീപത്തെ രണ്ടു കുട്ടികളെ അക്രമിച്ച ശേഷം വളപുരത്തെ പാടശേഖരം വഴികുരുവമ്പലത്തേക്ക് കടന്ന് പൊട്ടിപ്പാറയിലെ രണ്ട് കുട്ടികളെയും അക്രമിച്ചു.
കുരുവമ്പലം സ്വദേശികളായ തച്ചര്‍ക്കുഴിയില്‍ നൗഷാദിന്റെ മകന്‍ ഇര്‍ഫാ(10)നും അരങ്ങനാത്ത് കുഞ്ഞിപ്പയുടെ ഒന്നര വയസുള്ള മകള്‍ക്കുമാണ് കടിയേറ്റത്. വീടിനു സമീപത്ത് കളിച്ചുകൊണ്ടിരിക്കുന്ന കുട്ടികളെ നായ പിറകില്‍ നിന്നും വീഴ്ത്തിയ ശേഷം അക്രമിക്കുകയായിരുന്നു. പത്തു വയസുകാരന്‍ ഇര്‍ഫാന് കൈയിനും കാലിനും കൈപ്പലക്കും പരുക്കേറ്റിട്ടുണ്ട്.
ഒന്നര വയസുകാരിക്ക് നെഞ്ചിനാണ് കടിയേറ്റിരിക്കുന്നത്. പരുക്കേറ്റ കുട്ടികളെയെല്ലാം മഞ്ചേരി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കൂടുതല്‍ പേര്‍ക്ക് കടിയേറ്റതായി സൂചനയുണ്ട്.