പാരിസ്: കളിക്കളത്തില്‍ ഓടുന്നതിനിടെ കളിക്കാരന്റെ ദേഹത്ത് തട്ടി റഫറി വീഴുന്നു. തന്നെ തട്ടിയ കളിക്കാരനെ കിടന്ന കിടപ്പില്‍ കാല്‍ നീട്ടി ഫൗള്‍ ചെയ്യാന്‍ ശ്രമിച്ച് റഫറി പരാജയപ്പെടുന്നു. എഴുന്നേറ്റ് വന്ന റഫറി പോക്കറ്റില്‍ നിന്ന് ആദ്യം മഞ്ഞ കാര്‍ഡ് എടുത്തുയര്‍ത്തുന്നു. പിന്നാലെ ചുവപ്പ് കാര്‍ഡും! ഫ്രഞ്ച് ലീഗ് വണ്‍ പോരാട്ടത്തിലാണ് ഫുട്‌ബോള്‍ ലോകത്തെ അമ്പരിപ്പിച്ച നാടകീയ സംഭവങ്ങള്‍ അരങ്ങേറിയത്.
പാരിസ് സെന്റ് ജെര്‍മെയ്ന്‍- നാന്റസ് പോരാട്ടമാണ് റഫറിയുടെ അമ്പരപ്പിക്കുന്ന തീരുമാനങ്ങളാല്‍ ശ്രദ്ധേയമായത്. റഫറി ടോണി ചാപ്രോണാണ് കഥാപാത്രം. നാന്റസിന്റെ ഡീഗോ കാര്‍ലോസാണ് ഹതഭാഗ്യനായി തീര്‍ന്ന താരം. നേരത്തെ ഒരു മഞ്ഞ കാര്‍ഡ് കണ്ടതിനാലാണ് താരത്തിന് ചുവപ്പ് ലഭിച്ചത്.