റിയാദ്: മൊബൈല്‍ കടകളും അനുബന്ധ മേഖലകളും സ്വദേശി വല്‍ക്കരിച്ചതോടെ പതിനായിരത്തിലധികം സഊദി വനിതകളും ഈ മേഖലയിലേക്ക് . തങ്ങളുടെ കഴിവ് തെളിയിച്ചു പ്രത്യേകം പരിശീലനം നേടിയ വനിതകളാണ് മൊബൈല്‍ റിപ്പയറിംഗ് രംഗത്തേക് കടന്നു വന്നത്. മൊബൈല്‍ ഫോണ്‍ അറ്റകുറ്റപ്പണിയില്‍ പ്രാഗല്‍ഭ്യം നേടിയ ഇവര്‍ മറ്റു വനിതകള്‍ക്ക് കൂടുതല്‍ പ്രചോദനമായിരിക്കുകയാണ്. രാജ്യത്തെ വനിത സെന്ററുകള്‍ മുഖേന സൗജന്യമായാണ് വനിതകള്‍ക്ക് പ്രത്യേക പരിശീലനം നല്‍കിയത്. വനിതകളുടെ തൊഴില്‍ സാധ്യതകള്‍ വര്‍ധിപ്പിക്കുക എന്ന ലക്ഷ്യത്തോടെ ടെക്‌നിക്കല്‍ ആന്റ് വൊക്കേഷനല്‍ ട്രെയിനിങ് കോഓപറേഷന്‍ (ടിവിടിസി) സംഘടിപ്പിച്ച സൗജന്യ പരിശീലന പരിപാടിയിലൂടെയാണ് വനിതകള്‍ പരിശീലനം പൂര്‍ത്തിയാക്കിയത്.രാജ്യത്തിന്റെ വിവിധ ഭാഗങ്ങളിലെ 19 ട്രെയിനിങ് കോളജുകളിലായി 10,769 വിദ്യാര്‍ഥിനികള്‍ക്കാണ് പരിശീലനം നല്‍കിയത്. മൊബൈല്‍ ഫോണ്‍ അറ്റകുറ്റപ്പണിക്കു പുറമേ വില്‍പന, ഉപഭോക്തൃ സേവനം, സ്മാര്‍ട്ട് ഫോണുകളുടെ അറ്റകുറ്റപ്പണി എന്നിവയിലും പരിശീലനം നല്‍കുന്നുണ്ട്. പരിശീലനം ലഭിച്ച വനിതള്‍ക്ക് മൊബൈല്‍ ഫോണ്‍ വില്‍പ്പനഅറ്റകുറ്റപ്പണി സ്ഥാപനങ്ങളില്‍ ജോലി ചെയ്യുകയോ സ്വന്തമായി സ്ഥാപനം തുടങ്ങാനുള്ള ലൈസന്‍സ് നേടുകയോ ചെയ്യാനുള്ള സംവിധാനവും മന്ത്രാലയങ്ങള്‍ സജ്ജീകരിച്ചിട്ടുണ്ട്. ഇതിനകം പ്രധാന നഗരങ്ങളിലും മാളുകളിലും വനിതകള്‍ക്കായുള്ള മൊബൈല്‍ കടകളും പ്രത്യേക കൗണ്ടറുകളും ആരംഭിക്കുകയും ചെയ്തിട്ടുണ്ട്. വനിതകളുടെ തൊഴില്‍ സാധ്യത വര്‍ധിപ്പിക്കുന്നതിന് വീട്ടിലിരുന്ന് ചെയ്യാവുന്ന വിദൂര തൊഴില്‍ പദ്ധതി ഉള്‍പ്പെടെ നിരവധി പദ്ധതികളാണ് സഊദി അറേബ്യ ആവിഷ്‌കരിച്ചിട്ടുള്ളത്.