തിരുവനന്തപുരം: തമിഴ്‌നാട്ടിലേക്കുള്ള സര്‍വിസുകളില്‍ യാത്രാക്കൂലി വര്‍ധിപ്പിച്ച് കെ.എസ്.ആര്‍.ടി.സി. നിലവിലെ നിരക്കില്‍നിന്ന് ഒരു രൂപയാണ് വര്‍ധിക്കുക. ഇതോടെ മിനിമം ചാര്‍ജ് ഏഴുരൂപയാകും. തമിഴ്‌നാട് സര്‍ക്കാര്‍ ബസ് യാത്രാ നിരക്ക് വര്‍ധിപ്പിച്ച സാഹചര്യം കണക്കിലെടുത്താണ് കേരളത്തില്‍ നിന്നുള്ള സര്‍വിസുകളുടെ നിരക്ക് വര്‍ധിപ്പിച്ചതെന്ന് കെ.എസ്.ആര്‍.ടി.സി അറിയിച്ചു. നിരക്ക് വര്‍ധന ഇന്ന് മുതല്‍ പ്രാബല്യത്തില്‍ വരും.
ഇന്നലെയാണ് തമിഴ്‌നാട് സര്‍ക്കാര്‍ ചാര്‍ജ് വര്‍ധിപ്പിച്ചതായുള്ള സര്‍ക്കുലര്‍ പുറത്തിറക്കിയത്. ഇതോടെ തമിഴ്‌നാടുമായുള്ള അന്തര്‍ സംസ്ഥാന കരാര്‍ പ്രകാരം കെ.എസ്.ആര്‍.ടി.സിയുടെ എല്ലാ വിഭാഗം ബസുകള്‍ക്കും നിരക്ക് വര്‍ധിപ്പിച്ചതായി കെ.എസ്.ആര്‍.ടി.സിയും ഉത്തരവിറക്കുകയായിരുന്നു. ഇത് സംബന്ധിച്ച് അടിയന്തര നടപടികള്‍ എടുക്കുന്നതിനുള്ള നിര്‍ദേശം എല്ലാ ഡിപ്പോ അധികാരികള്‍ക്കും നല്‍കി.