ദോഹ: ചൈനയില്‍ നടക്കുന്ന എ.എഫ്.സി അണ്ടര്‍ 23 ഏഷ്യന്‍ ചാംപ്യന്‍ഷിപ്പില്‍ ഖത്തര്‍ സെമിഫൈനലില്‍. ഇന്നലെ ഉച്ചയ്ക്കുശേഷം നടന്ന ആവേശകരമായ ക്വാര്‍ട്ടര്‍ ഫൈനലില്‍ രണ്ടിനെതിരെ മൂന്നു ഗോളുകള്‍ക്ക് ഫലസ്തീനെ പരാജയപ്പെടുത്തിയാണ് ഖത്തര്‍ അവസാന നാലില്‍ ഇടംനേടിയത്. അവസാന നിമിഷംവരെ ഉദ്വേഗം നിറഞ്ഞ മുഹൂര്‍ത്തങ്ങള്‍ക്കൊടുവിലാണ് ഖത്തറിന്റെ സെമിപ്രവേശം. മൂന്നു ഗോളുകളുടെ ലീഡ് നേടിയശേഷമാണ് ഖത്തര്‍ രണ്ടുഗോള്‍ വഴങ്ങിയത്. ആദ്യ പകുതിയുടെ 32, 34 മിനിട്ടുകളില്‍ അലി അബ്ദുല്ലയും 53ാം മിനിട്ടില്‍ ഹാഷിം അലിയുമാണ് ഖത്തറിനായി സ്‌കോര്‍ ചെയ്തത്. 60ാംമിനിട്ടില്‍ ഒദയ് ദബ്ബാഗും 87ാം മിനിട്ടില്‍ മുഹമ്മദ് ദാര്‍വിഷും ഫലസ്തീനുവേണ്ടി ഗോളുകള്‍ സ്‌കോര്‍ ചെയ്തു.
അവസാന നിമിഷങ്ങളില്‍ മത്സരത്തിലേക്ക് ഫലസ്തീന്‍ ശക്തമായി തിരിച്ചെത്തിയെങ്കിലും ഖത്തര്‍ അവസരത്തിനൊത്തുയരുകയായിരുന്നു.
ചൊവ്വാഴ്ച നടക്കുന്ന സെമിയില്‍ ഇറാഖ്-വിയറ്റ്‌നാം മത്സരത്തിലെ വിജയികളെ ഖത്തര്‍ നേരിടും. ഇന്നലെ നടന്ന മറ്റൊരു ക്വാര്‍ട്ടര്‍ ഫൈനല്‍ മത്സരത്തില്‍ ഉസ്ബക്കിസ്താന്‍ എതിരില്ലാത്ത നാലുഗോളുകള്‍ക്ക് ജപ്പാനെ തകര്‍ത്തു. ഇന്ന് നടക്കുന്ന ദക്ഷിണ കൊറിയ- മലേഷ്യ ക്വാര്‍ട്ടര്‍ മത്സരത്തിലെ വിജയികളെ ഉസ്ബക്കിസ്ഥാന്‍ സെമിയില്‍ നേരിടും.