കൊച്ചി: എറണാകുളം നോര്‍ത്ത് പൊലിസ് സ്റ്റേഷനിലെ പ്രൊബേഷണറി സബ് ഇന്‍സ്‌പെക്ടറായിരുന്ന തിരുവനന്തപുരം ഊരുട്ടമ്പലം ഗോവിന്ദമംഗലം മേലെതട്ടന്‍വിള വിജയഭവനില്‍ ടി. ഗോപകുമാര്‍ (39) ഹോട്ടല്‍ മുറിയില്‍ തൂങ്ങിമരിച്ച സംഭവത്തില്‍ പൊലിസ് അന്വേഷണം ആരംഭിച്ചു. ഡി.ജി.പിയുടെ നിര്‍ദേശപ്രകാരം ഡി.സി.പി എ.ആര്‍ പ്രേംകുമാറിന്റെ നേതൃത്വത്തിലാണ് അന്വേഷണം. മേലുദ്യോഗസ്ഥന്മാരുടെ സമ്മര്‍ദമാണ് ആത്മഹത്യയിലേക്ക് നയിച്ചതെന്ന് സൂചിപ്പിക്കുന്ന പരാമര്‍ശം ആത്മഹത്യാക്കുറിപ്പിലുണ്ടായിരുന്നു. ഗോപകുമാറിന് അമിത ജോലിഭാരം നല്‍കിയിരുന്നോ, മാനസികമായി പീഡപ്പിച്ചിരുന്നോ തുടങ്ങിയവ അന്വേഷണപരിധിയില്‍ വരുമെന്ന് ഡി.സി.പി പറഞ്ഞു.
അതേസമയം, ഗോപകുമാറിന്റെ മരണത്തിനു കാരണക്കാരായ ഉദ്യോഗസ്ഥര്‍ക്ക് ശിക്ഷ വാങ്ങിക്കൊടുക്കുന്നതുവരെ നിയമനടപടികളുമായി മുന്നോട്ടുപോകുമെന്ന് മൃതദേഹം ഏറ്റുവാങ്ങാനെത്തിയ ബന്ധുക്കള്‍ പറഞ്ഞു. മേലുദ്യോഗസ്ഥരില്‍നിന്ന് സമ്മര്‍ദമുണ്ടെന്നും അധികകാലം ജോലിയില്‍ തുടരാന്‍ കഴിയില്ലെന്നും ഗോപകുമാര്‍ സൂചിപ്പിച്ചിരുന്നതായി ബന്ധുക്കള്‍ പറഞ്ഞു. ആറുമാസം മുന്‍പാണ് ഗോപകുമാര്‍ എസ്.ഐ സെലക്ഷന്‍ ലഭിച്ച് പ്രൊബേഷണറി എസ്.ഐ ആയി നോര്‍ത്ത് സ്റ്റേഷനില്‍ എത്തിയത്.