ജിദ്ദ: സഊദിയിലെ ജിസാന്‍ പ്രവിശ്യയില്‍ ഹറൂബ് അല്‍ക്കദമി റോഡില്‍ കഴിഞ്ഞ ആഴ്ച ഉണ്ടായ റോഡപകടത്തില്‍ ഭാര്യയെയും ആറു മക്കളെയും നഷ്ടമായ സമി അല്‍ നഅമിക്ക് സഹായവുമായി സഊദി ഭരണാധികാരി സല്‍മാന്‍ രാജാവ്. പ്രിയപ്പെട്ടവരെ നഷ്ടമായ സമിയ്ക്ക് ജീവിതത്തിലേക്കു തിരിച്ചു വരാന്‍ പുതിയ വീടും കാറും അനുവദിക്കാനാണ് രാജാവിന്റെ നിര്‍ദേശമെന്ന് സഊദി വാര്‍ത്താ ഏജന്‍സി റിപ്പോര്‍ട്ട് ചെയ്തു.
മൃതദേഹങ്ങള്‍ക്ക് സമീപമിരുന്ന് വിതുമ്പുന്ന സമിയുടെ ചിത്രം കഴിഞ്ഞ ദിവസം പുറത്തു വന്നിരുന്നു.
ഇക്കഴിഞ്ഞ ചൊവ്വാഴ്ച ഉച്ചക്കാണ് അപകടമുണ്ടായത്. ഹറൂബിലേക്ക് വിനോദയാത്ര പോവുകയായിരുന്നു സമിയും കുടുംബവും. മറ്റൊരു വീട്ടിലായിരുന്നതിനാല്‍ ഒരു മകനും രണ്ടാനമ്മയും സംഘത്തിലുണ്ടായിരുന്നില്ല. രക്ഷപ്പെട്ട മകനാകട്ടെ തന്റെ ഉമ്മയും സഹോദരങ്ങളും മരിച്ച വിവരമറിഞ്ഞതോടെ സംസാരശേഷി നഷ്ടമായി.