ലഖ്‌നോ: ഉത്തര്‍പ്രദേശ് നിയമസഭാ തെരഞ്ഞെടുപ്പിന്റെ ആദ്യഘട്ട വോട്ടെടുപ്പ് തുടങ്ങി. പശ്ചിമ യു.പിയിലെ 73 നിയമസഭാ മണ്ഡലങ്ങളിലേക്കാണ് ഇന്ന് തെരഞ്ഞെടുപ്പ് നടക്കുന്നത്. രാവിലെ ഏഴ് മുതല്‍ വൈകിട്ട് അഞ്ചുവരെയാണ് പോളിങ്.

2013ല്‍ വര്‍ഗ്ഗീയ കലാപം നടന്ന മുസാഫര്‍നഗര്‍, ഷംലി ഉള്‍പ്പെടെയുള്ള 15 ജില്ലകള്‍ ഇതില്‍പ്പെടും. അനിഷ്ട സംഭവങ്ങള്‍ ഒഴിവാക്കാന്‍ പൊലിസ് കനത്ത സുരക്ഷ ഏര്‍പ്പെടുത്തിയിട്ടുണ്ട്.

അതേസമയം, വോട്ട് ചെയ്യാനായി ബൂത്തിലെത്തുന്ന സ്ത്രീ വോട്ടര്‍മാരെ റോസാപൂ നല്‍കിയാണ് തെരഞ്ഞെടുപ്പ് കമ്മിഷന്‍ സ്വീകരിക്കുന്നത്. തങ്ങള്‍ക്കാദ്യമായാണ് ഇത്തരം അനുഭവമെന്ന് വോട്ട് ചെയ്യാനെത്തിയ സ്ത്രീകള്‍ പറഞ്ഞു. സംസ്ഥാനത്തുടനീളം 1,17,65,768 സ്ത്രീ വോട്ടര്‍മാരാണുള്ളത്.

ഈ മാസം 15, 19, 23, 27, മാര്‍ച്ച് നാല്, എട്ട് തീയതികളിലായാണ് അടുത്തഘട്ട തെരഞ്ഞെടുപ്പ് നടക്കുക. മാര്‍ച്ച്് പത്തിനാണ് ഫലം പുറത്തുവരിക.
കഴിഞ്ഞ തെരഞ്ഞെടുപ്പില്‍ എസ്.പിയും ബി.എസ്.പിയും 24 വീതം സീറ്റുകളില്‍ വിജയിച്ചിരുന്നു. ബിജെപിക്ക് 11 സീറ്റുകളാണു ലഭിച്ചത്.