ഇരിക്കൂര്‍: കല്യാട് റോഡിലെ ബദ്‌രിയ മസ്ജിദില്‍ പട്ടാപ്പകല്‍ മോഷണം. ഇന്നലെ ഉച്ചയ്ക്കു പള്ളി ഇമാം ജുമാനമസ്‌കാരത്തിന് പോയ സമയത്താണ് മോഷണം നടന്നത്.
പള്ളിയുടെ മുന്‍ഭാഗത്തെ ഗ്രില്‍സ് തുറന്ന് ഇമാമിന്റെ മുറിയുടെ പൂട്ടുപൊളിച്ചാണ് കവര്‍ച്ച നടത്തിയത്. ഷെല്‍ഫില്‍ സൂക്ഷിച്ച എട്ടായിരം രൂപയും നബിദിനാഘോഷ പരിപാടിക്കിടെ സംഭാവനയായി ലഭിച്ച ഒന്നര പവന്‍ തൂക്കമുള്ള കമ്മലും രണ്ട് ഭണ്ഡാരങ്ങള്‍ പൊളിച്ച് അതിലുണ്ടായിരുന്ന അയ്യായിരത്തോളം രൂപയുമാണ് മോഷ്ടിച്ചത്. ഇന്നലെ  വൈകുന്നേരം മൂന്നരയ്ക്ക് ഇമാം തിരിച്ചെത്തിയപ്പോഴാണ് മോഷണ വിവരം അറിഞ്ഞത്.
അലമാരയിലെ രേഖകളും  പുസ്തകങ്ങളും മറ്റും വാരിവലിച്ചിട്ടിട്ടുണ്ട്. ഭണ്ഡാരങ്ങളിലെ ചില്ലറ ഉപേക്ഷിച്ച നിലയിലാണ്. ഇരിക്കൂര്‍ പൊലിസ്  അന്വേഷണമാരംഭിച്ചു.