വാഷിങ്ടണ്‍: യു.എസ് പ്രസിഡന്റ് തെരഞ്ഞെടുപ്പില്‍ റഷ്യന്‍ ഇടപെടലുമായി ബന്ധപ്പെട്ട അന്വേഷണ കമ്മിഷനുമായി കൂടിക്കാഴ്ചക്ക് തായാറാണെന്ന് ഡൊണാള്‍ഡ് ട്രംപ്. റോബര്‍ട്ട് മ്യൂളറുടെ നേതൃത്വത്തിലുള്ള പ്രത്യേക കൗണ്‍സിലാണ് റഷ്യന്‍ ബന്ധം അന്വേഷിക്കുന്നത്. അന്വേഷണ കമ്മിറ്റിയുടെ ചോദ്യം ചെയ്യലിനു സത്യപ്രതിജ്ഞ അനുസൃതമായി വിധേയനാവാന്‍ തയാറാണെന്നും കഴിയും വേഗത്തില്‍ അത് സാധ്യമാവുമെന്നും ട്രംപ് പറഞ്ഞു.
വൈറ്റ് ഹൗസില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം. മുന്‍ സുരക്ഷാ ഉപദേശകനായ മൈക്കല്‍ ഫ്‌ലൈന്‍, എഫ്.ബി.ഐ ഡയരക്ടര്‍ ജെയിംസ് കോമെ എന്നിവരെ പുറത്താക്കിയതുമായി ബന്ധപ്പെട്ട് മ്യൂളറുമായുള്ള കൂടിക്കാഴ്ചക്ക് തയാറാണോയെന്ന് മാധ്യമപ്രവര്‍ത്തരുടെ ചോദ്യത്തിന് മറുപടി പറയുകയായിരുന്നു ട്രംപ്. മ്യൂളറുമായുള്ള കൂടിക്കാഴ്ച ഉടനുണ്ടാകുമെന്നും ട്രംപ് സൂചിപ്പിച്ചു.
രണ്ടോ മൂന്നോ ആഴ്ചകള്‍ക്കുള്ളില്‍ അന്വേഷണ കമ്മിറ്റിയുമായി കൂടിക്കാഴ്ച നടത്താന്‍ സാധിക്കുമെന്ന് കരുതുന്നുവെന്നും എന്നാല്‍ വിഷയം തന്റെ അഭിഭാഷകരാണ് തീരുമാനിക്കേണ്ടെതെന്നും ട്രംപ് പറഞ്ഞു. റഷ്യന്‍ ഇടപെടലുമായി ബന്ധപ്പെട്ട് യു.എസ് അറ്റോര്‍ണി ജനറല്‍ ജെഫ് സെഷന്‍സിനെ മ്യൂളര്‍ കഴിഞ്ഞ ദിവസം ചോദ്യം ചെയ്തിരുന്നു.