അബൂദബി: യു.എ.ഇ പ്രസിഡന്റ് ശൈഖ് ഖലീഫ ബിന്‍ സായിദ് ആല്‍ നഹ്‌യാന്റെ മാതാവ് ശൈഖ ഹസ്സ ബിന്‍ത് മുഹമ്മദ് ആല്‍ നഹ്‌യാന്‍ അന്തരിച്ചു. പ്രസിഡന്‍ഷ്യല്‍ അഫയേഴ്‌സ് മന്ത്രാലയമാണ് മരണവിവരം പുറത്തുവിട്ടത്. ഇതേതുടര്‍ന്ന് ഇന്നു മുതല്‍ മൂന്നു ദിവസത്തേക്ക് രാജ്യത്ത് ഔദ്യോഗിക ദുഃഖാചരണം പ്രഖ്യാപിച്ചു.
ശൈഖ ഹസ്സയുടെ മരണത്തില്‍ ദുഃഖം അറിയിക്കുന്നുവെന്നും മരണത്തിലൂടെ വലിയ നഷ്ടമാണ് യു.എ.ഇയിലെ ജനങ്ങള്‍ക്ക് ഉണ്ടായതെന്നും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് ആല്‍ മക്തൂം പറഞ്ഞു.
അബൂദബി കിരീടാവകാശിയും യു.എ.ഇ സായുധസേനയുടെ ഉപ സര്‍വസൈന്യാധിപനുമായ ശൈഖ് മുഹമ്മദ് ബിന്‍ സായിദ് ആല്‍ നഹ്‌യാന്‍, ഷാര്‍ജ ഭരണാധികാരി ഡോ. ശൈഖ് സുല്‍ത്താന്‍ ബിന്‍ മുഹമ്മദ് അല്‍ ഖാസിമി, ദുബൈ കിരീടാവകാശി ശൈഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് ആല്‍ മക്തൂം തുടങ്ങി നിരവധി നേതാക്കള്‍ അനുശോചനം രേഖപ്പെടുത്തി.