ലാഹോര്‍: പാകിസ്താനിലെ ലാഹോറില്‍ പ്രതിഷേധ പ്രകടനത്തിനിടെയുണ്ടായ ചാവേറാക്രമണത്തില്‍ പൊലിസുദ്യോഗസ്ഥരടക്കം 13 പേര്‍ കൊല്ലപ്പെട്ടു. 85 പേര്‍ക്ക് പരുക്കേറ്റിട്ടുണ്ടെന്നാണ് റിപ്പോര്‍ട്ട്. ലാഹോറിലെ പഞ്ചാബില്‍ തിങ്കളാഴ്ച വൈകിട്ട് ആറു മണിയോടെയാണ് സംഭവം.

കൊല്ലപ്പെട്ടവരില്‍ ആറു പൊലിസുകാരുണ്ടെന്ന് പഞ്ചാബ് പൊലിസ് ഇന്‍സ്‌പെക്ടര്‍ ജനറല്‍ മുഷ്താഖ് അഹമ്മദ് സുഖേര സ്ഥിരീകരിച്ചു. ഇതില്‍ രണ്ടു പേര്‍ മുതിര്‍ന്ന ഉദ്യോഗസ്ഥരാണ്.

തെഹ്‌രീഖേ താലിബാന്‍ പാകിസ്താന്‍ എന്ന നിരോധിത ഭീകരസംഘടന ആക്രമണത്തിന്റെ ഉത്തരവാദിത്തം ഏറ്റെടുത്തു.

അനധികൃത മരുന്നുവില്‍പ്പനയ്‌ക്കെതിരേയുണ്ടായ സര്‍ക്കാര്‍ നടപടിയില്‍ പ്രതിഷേധിച്ച് നടത്തിയ ഫാര്‍മസ്യൂട്ടിക്കല്‍, കെമിക്കല്‍ കമ്പനികളുടെ പ്രതിഷേധത്തിനിടെയാണ് സ്‌ഫോടനമുണ്ടായത്. പ്രതിഷേധത്തില്‍ 400 ല്‍ അധികം പേര്‍ സംബന്ധിച്ചിരുന്നു.