കൊച്ചി: തദ്ദേശസ്വയംഭരണസ്ഥാപനങ്ങള്‍ പദ്ധതി നിര്‍വഹണം പൂര്‍ത്തിയാക്കുമ്പോള്‍ അവശ്യ സേവന മേഖലകള്‍ക്കു മുന്‍ഗണന നല്‍കണമെന്ന് തദ്ദേശസ്വയംഭരണ വകുപ്പ് പ്രിന്‍സിപ്പല്‍ സെക്രട്ടറി ടി.കെ. ജോസ് നിര്‍ദേശിച്ചു. കലക്ടറേറ്റ് ജില്ലാ ആസൂത്രണ സമിതി സെക്രട്ടേറിയറ്റ് ഹാളില്‍ ചേര്‍ന്ന ആസൂത്രണ സമിതി യോഗത്തില്‍ മുഖ്യപ്രഭാഷണം നടത്തുകയായിരുന്നു അദ്ദേഹം. അംഗന്‍വാടികള്‍, അധിക പോഷകാഹാരം, തുറന്നയിടങ്ങളിലെ വിസര്‍ജനം തടയല്‍, പ്രധാന മന്ത്രി ആവാസ് യോജന, ആരോഗ്യം, വിദ്യാഭ്യാസം, കുടിവെള്ളം എന്നിവയ്ക്കായിരിക്കണം പ്രാധാന്യം നല്‍കേണ്ടത്.  എറണാകുളം ജില്ലയില്‍ നിന്ന് വരവു കൂടിയിട്ടുണ്ട്. ഇനി ശേഷിക്കുന്ന 45 ദിവസത്തിനുള്ളില്‍ ചെലവ് പൂര്‍ത്തിയാക്കാന്‍ ഒരുമിച്ചു നിന്നു പ്രവര്‍ത്തിക്കണമെന്ന് അദ്ദേഹം പറഞ്ഞു. മികച്ച അങ്കന്‍വാടി പൂര്‍ത്തിയാക്കിയ പിറവം നഗരസഭയെ പ്രിന്‍സിപ്പല്‍ സെക്രട്ടറി അഭിനന്ദിച്ചു.
ജില്ലാ പഞ്ചായത്തുമായി ബന്ധപ്പെട്ട് രണ്ടു ശ്മശാനം, ഏഴു സെമിത്തേരികള്‍, അറവുശാല എന്നിവയ്ക്കായി നാലുകോടിയുടെ പദ്ധതി സമര്‍പ്പിച്ചിട്ടുണ്ടെന്ന് യോഗം അധ്യക്ഷ കൂടിയായ ജില്ലാ പഞ്ചായത്ത് പ്രസിഡന്റ് ആശ സനില്‍ അറിയിച്ചു. ഏഴു ക്രിമിറ്റോറിയങ്ങളുടെ പദ്ധതി കിഫ്ബിയില്‍പ്പെടുത്താനുള്ള സാധ്യത പരിശോധിക്കണമെന്ന് പ്രിന്‍സിപ്പല്‍ സെക്രട്ടറി നിര്‍ദേശിച്ചു.
യോഗത്തില്‍ മെമ്പര്‍ സെക്രട്ടറി കൂടിയ ജില്ലാ കലക്ടര്‍ മുഹമ്മദ് വൈ. സഫീറുള്ള പങ്കെടുത്തു.