മട്ടാഞ്ചേരി: ഇരുവിഭാഗം വിദ്യാര്‍ഥി സംഘടനകള്‍ തമ്മില്‍ കൊച്ചിന്‍ കോളജില്‍ ഉടലെടുത്ത സംഘര്‍ഷാവസ്ഥക്ക് അയവില്ല. ഇന്നലെ യൂത്ത് കോണ്‍ഗ്രസ് പ്രവര്‍ത്തകര്‍ കോളജിലേക്ക് മാര്‍ച്ച് നടത്തിയതാണ് സംഘര്‍ഷാവസ്ഥ വീണ്ടും ഉടലെടുക്കാന്‍ കാരണമായത്. യൂത്ത് കോണ്‍ഗ്രസ് മാര്‍ച്ചിനെ തുടര്‍ന്ന് എസ്.എഫ്.ഐയുടെ നേതൃത്വത്തില്‍ നൂറ് കണക്കിന് വിദ്യാര്‍ഥികള്‍ കോളജിന് മുന്നില്‍ മുദ്രാവാക്യം വിളികളുമായി തടിച്ചുകൂടി. പള്ളുരുത്തി സര്‍ക്കിള്‍ ഇന്‍സ്‌പെക്ടര്‍ കെ.ജി അനീഷ്, ഫോര്‍ട്ട്‌കൊച്ചി സര്‍ക്കിള്‍ ഇന്‍സ്‌പെക്ടര്‍ പി.മനോജ് കുമാര്‍, പള്ളുരുത്തി എസ്.ഐ.വി വിമല്‍, ഫോര്‍ട്ട്‌കൊച്ചി എസ്.ഐ ആന്റ ണി നെറ്റോ എന്നിവരുടെ നേതൃത്വത്തില്‍ വന്‍ പൊലിസ് സംഘം എത്തി സ്ഥിതിഗതികള്‍ നിയന്ത്രിച്ചു.
അതേസമയം കെ.എസ്.യു പ്രവര്‍ത്തകര്‍ കോളജില്‍ റാഗിങ് നടത്തുകയാണെന്നും ഇത് അവസാനിപ്പിക്കണമെന്നും എസ്.എഫ്.ഐ നേതാക്കള്‍ പറഞ്ഞു. ഒന്നാം വര്‍ഷ ഡിഗ്രി വിദ്യാര്‍ഥിയും എസ്.എഫ്.ഐ ഏരിയ കമ്മിറ്റിയംഗവുമായ ഷാനിനെ കഴിഞ്ഞ അവധി ദിനമായ  ശനിയാഴ്ച കോളജിലേക്ക് വിളിച്ച് വരുത്തി കെ.എസ്.യു പ്രവര്‍ത്തകര്‍ മര്‍ദിച്ചതോടെയാണ് സംഘര്‍ഷം ഉടലെടുത്തത്. തുടര്‍ന്ന് കെ.എസ്.യു പ്രവര്‍ത്തകരെ സി.പി.എമ്മുകാര്‍ മര്‍ദിച്ചതായി ആരോപിച്ച്  കെ.എസ്.യുവും രംഗത്തെത്തി.