മലപ്പുറം: തോല്‍വിയില്‍ നിന്നും പാഠം പഠിക്കാന്‍ തയ്യാറാകാത്തതാണ് കോണ്‍ഗ്രസിനെ കേരളത്തില്‍ വന്‍ തകര്‍ച്ചയിലേക്ക് നയിക്കുന്നതെന്ന് സിപി എം കേന്ദ്ര കമ്മിറ്റിയംഗം എ വിജയരാഘവന്‍. വര്‍ഗീയതയുമായി യുഡിഎഫ് സന്ധി നടത്തിയു തെരഞ്ഞെടുപ്പില്‍ അവര്‍ക്ക് വന്‍ തിരിച്ചടിക്ക് കാരണമായി. എന്നാല്‍ ഇപ്പോഴും വര്‍ഗീയതയെ തുറന്നെതിര്‍ക്കാന്‍ കോണ്‍ഗ്രസ് തയ്യാറല്ല. കേരള എന്‍ജിഒ യൂനിയന്‍ സംസ്ഥാന സമ്മേളനത്തിന്റെ സമാപന സമ്മേളനം മലപ്പുറം നഗരസഭാ ടൗണ്‍ഹാള്‍ പരിസരത്ത് ഉദ്ഘാടനം ചെയ്യുകയായിരുന്നു വിജയരാഘവന്‍. പ്രതിപക്ഷസ്ഥാനം ഉമ്മന്‍ ചാണ്ടിക്ക് നല്‍കരുതെന്ന് കോണ്‍ഗ്രസ് നേതാക്കള്‍ക്കു പോലും പറയേണ്ടിവന്നെന്ന് അദ്ദേഹം കുറ്റപ്പെടുത്തി. സംസ്ഥാനത്ത് ഒരു സീറ്റ് കിട്ടിയതിന്റെ ബലത്തില്‍ സിപിഎമ്മിനെതിരെ അക്രമം അഴിച്ചുവിടാമെന്ന ധാരണയിലാണ് സംഘപരിവാര്‍. കേന്ദ്രമന്ത്രിമാരും ഇതിനുകൂലമായി പ്രസ്താവനയിറക്കുന്നു. ഏതു മേഖലയില്‍ മുന്നേറ്റമുണ്ടാക്കിയിട്ടാണു കേന്ദ്ര സര്‍ക്കാര്‍ രണ്ടാം വാര്‍ഷികം ആഘോഷിക്കുന്നതെന്നു ബിജെപി വ്യക്തമാക്കണമെന്നും അദ്ദേഹം ആവശ്യപ്പെട്ടു.