മഞ്ചേശ്വരം: ട്രെയിനെത്താന്‍ നിമിഷങ്ങള്‍ മാത്രം ബാക്കിയിരിക്കെ റെയില്‍വേ ഗേറ്റിലെ ട്രാക്കില്‍ മിനി ടെമ്പോ വാന്‍ കുടുങ്ങി. ഇന്നലെ രാവിലെ ഹൊസങ്കടി ജങ്ഷന്‍ റെയില്‍വേ ഗേറ്റിലായിരുന്നു സംഭവം. രാവിലെ ഒന്‍പതരയോടെ മംഗളൂരുവിലേയ്ക്കുള്ള ട്രെയിനിനു പോകാനായി ഗേറ്റടച്ചത്.
എന്നാല്‍ തിടുക്കത്തില്‍ ഗേറ്റിനു പുറത്തേക്കു കടക്കാന്‍ ശ്രമിക്കുന്നതിനിടെ ഫര്‍ണിച്ചറുകളുമായി പോവുകയായിരുന്ന മിനി ടെമ്പോ ഗേറ്റിനുള്ളിലാവുകയായിരുന്നു. ഉടന്‍ നാട്ടുകാര്‍ ഇടപെട്ട് ബലം പ്രയോഗിച്ചു വാഹനത്തെ ട്രാക്കില്‍ നിന്നു പുറത്തേക്കു തള്ളിമാറ്റിയാണ് അപകടം ഒഴിവാക്കിയത്. നാട്ടുകാരുടെ സന്ദര്‍ഭോചിതമായ ഇടപെടലിനെ റെയില്‍വേ അധികൃതര്‍ അഭിനന്ദിച്ചു.