കൊച്ചി: ടി.സി മാത്യു തന്നെ കണ്ടു പരാതി പറഞ്ഞ കാര്യം സരിത അറിഞ്ഞത് എങ്ങനെയെന്ന് അറിയില്ലെന്ന് മുന്‍മുഖ്യമന്ത്രി ഉമ്മന്‍ചാണ്ടി. സോളാര്‍ ആരോപണങ്ങളെക്കുറിച്ചന്വേഷിക്കുന്ന ജസ്റ്റിസ് ജി.ശിവരാജന്‍ കമ്മിഷനില്‍ സീനിയര്‍ ഗവണ്‍മെന്റ് പ്ലീഡര്‍ അഡ്വ. ബി. വിനോദിന്റെ ചോദ്യത്തിന് മറുപടി പറയുകയായിരുന്നു അദ്ദേഹം.
സോളാര്‍ കേസിലെ പരാതിക്കാരനായ ടി.സി മാത്യു ഒരു ദുഃഖശനി ദിവസം തന്നെ വന്നുകണ്ടു പരാതിപ്പെട്ടിരുന്നു. പരാതി എഴുതിത്തരാന്‍ പറഞ്ഞപ്പോള്‍ അദ്ദേഹം ഒന്നുംമിണ്ടാതെ തിരിച്ചുപോയി. രണ്ടാമതൊരിക്കല്‍ വന്നപ്പോഴാണു പരാതി എഴുതിത്തന്നത്. അതില്‍ അന്വേഷണവും നടത്തി. തനിച്ചായിരിക്കുമ്പോള്‍ തന്നെ വന്നുകണ്ട കാര്യം പിറ്റേന്നു സരിതയറിഞ്ഞതെങ്ങിനെയെന്നറിയില്ല. താന്‍ പറഞ്ഞിട്ടല്ല അറിഞ്ഞതെന്നും ഉമ്മന്‍ചാണ്ടി പറഞ്ഞു.
ചാലക്കുടി സ്വദേശി സി.എല്‍ ആന്റോ സമര്‍പ്പിച്ച പ്രോജക്ടില്‍ വെയ്‌സ്റ്റ് മാനേജ്‌മെന്റ് സംബന്ധിച്ച നിര്‍ദേശം അഭിപ്രായമറിയാനായി നഗര വികസനവകുപ്പിനു കൈമാറിയിരുന്നു. സി.എല്‍ ആന്റോ സമര്‍പ്പിച്ച പദ്ധതി നിര്‍ദേശം അപ്രായോഗികമാണെന്നു കണ്ട് ആസൂത്രണ ബോര്‍ഡ് തള്ളിയിരുന്നുവെന്ന് മന്ത്രി കെ.സി ജോസഫ് അറിയിച്ചുവെന്നാണ് ഉമ്മന്‍ചാണ്ടി നേരത്തെ കമ്മിഷനില്‍ നല്‍കിയ മൊഴി. കഴിഞ്ഞ ദിവസം കമ്മിഷനില്‍ ഇതു സംബന്ധിച്ച് സി.എല്‍ ആന്റോ ഉമ്മന്‍ചാണ്ടിയെ വിസ്തരിച്ചിരുന്നു.