ഹൈദരബാദ്: തിരുപ്പതി ലഡ്ഡു വിവാദത്തില്‍ പ്രധാനമന്ത്രി നരേന്ദ്ര മോദിക്ക് കത്തെഴുതി ആന്ധ്രപ്രദേശ് മുന്‍ മുഖ്യമന്ത്രിയും, വൈ.എസ്.ആര്‍.സി.പി കോണ്‍ഗ്രസ് നേതാവുമായ ജഗന്‍ മോഹന്‍ റെഡ്ഡി. ആന്ധ്രാപ്രദേശ് മുഖ്യമന്ത്രി ചന്ദ്രബാബു നായിഡു നടത്തിയ അടിസ്ഥാന രഹിതമായ ആരോപണങ്ങള്‍ക്കെതിരെ വേഗത്തില്‍ നടപടിയെടുക്കണമെന്നാണ് ആവശ്യം. 

' തിരുമല ക്ഷേത്രത്തിലെ പ്രസാദങ്ങള്‍ തയ്യാറാക്കാന്‍ ഉപയോഗിക്കുന്ന നെയ്യില്‍ മായം കലര്‍ന്നതാണെന്നും ഇതില്‍ മൃഗക്കൊഴുപ്പുണ്ടെന്നും ചന്ദ്രബാബു നായിഡു ആരോപിച്ചു. ഇത് തീര്‍ച്ചയായും രാഷ്ട്രീയ ലക്ഷ്യത്തോടെ പ്രചരിപ്പിച്ച നുണയാണ്. 2024 ജൂലൈ 12ന് തിരുപ്പതിയില്‍ മായം കലര്‍ത്തിയേക്കാവുന്ന നെയ്യ് അടങ്ങിയ ടാങ്കര്‍ എത്തി, എന്നാല്‍ അത് നിരസിക്കപ്പെട്ടു. പ്രസാദങ്ങള്‍ തയ്യാറാക്കാന്‍ ഈ നെയ്യ് ഉപയോഗിച്ചിരുന്നില്ല,' കത്തില്‍ പറയുന്നു. 

' രാഷ്ട്രീയ ലക്ഷ്യങ്ങള്‍ക്കായി മാത്രം കോടിക്കണക്കിന് ആളുകളുടെ വിശ്വാസങ്ങളെ ഗുരുതരമായി വ്രണപ്പെടുത്തുന്ന തരത്തില്‍ ചന്ദ്രബാബു നായിഡു താഴ്ന്നു. അദ്ദേഹത്തിന്റെ പ്രവര്‍ത്തനങ്ങള്‍ ഒരു മുഖ്യമന്ത്രിയുടെ മാത്രമല്ല, പൊതുജീവിതത്തിലെ എല്ലാവരുടെയും നിലവാരവും തിരുമല തിരുപ്പതി ദേവസ്വത്തിന്റെയും അതിന്റെ പ്രവര്‍ത്തനങ്ങളുടെയും പവിത്രതയും താഴ്ത്തി. ഈ നിര്‍ണായക ഘട്ടത്തില്‍ രാജ്യം മുഴുവന്‍ പ്രധാനമന്ത്രിയെ ഉറ്റുനോക്കുന്നു,' ജഗന്‍ കത്തില്‍ പറയുന്നു. 

തിരുപ്പതി ക്ഷേത്രത്തില്‍ പ്രസാദമായി നല്‍കുന്ന ലഡ്ഡു ഉണ്ടാക്കുന്നത് മൃഗക്കൊഴുപ്പ് കൊണ്ടാണെന്ന് ആന്ധ്രാപ്രദേശ് മുഖ്യമന്ത്രി ചന്ദ്രബാബു ആരോപിച്ചിരുന്നു. മൃഗക്കൊഴുപ്പിനൊപ്പം ഗുണനിലവാരമില്ലാത്ത ചേരുവകളും ലഡ്ഡു നിര്‍മാണത്തിന് ഉപയോഗിക്കുന്നുണ്ടെന്നും, വൈ.എസ്.ആര്‍ കോണ്‍ഗ്രസ് അധികാരത്തിലിരുന്ന കാലത്താണ് ഇക്കാര്യം സംഭവിച്ചതെന്നും ചന്ദ്രബാബു പറഞ്ഞിരുന്നു. മുഖ്യമന്ത്രിയുടെ പ്രസ്താവന ആന്ധ്രയില്‍ വലിയ വിവാദമായതിന് പിന്നാലെയാണ് ജഗന്‍ മോഹന്‍ റെഡ്ഡിയുടെ നീക്കം.

Animal Fat Controversy in Tirupati Laddu Jagan Mohan Reddy wrote a letter to Modi