നെയ്യാറ്റിന്‍കര: 50 ഗ്രാം കഞ്ചാവുമായി രണ്ട് യുവാക്കളെ കഴിഞ്ഞദിവസം നെയ്യാറ്റിന്‍കര എക്‌സൈസ് സംഘം പിടികൂടി. മാരായമുട്ടം ചുളളിയൂര്‍ തോപ്പില്‍ മേലെ പുത്തന്‍വീട്ടില്‍ അരുണ്‍രാജ് (20), സുജിത്‌രാജ് (21) എന്നിവരാണ് പിടിയിലായത്. ഇന്നലെ ഉച്ചയ്ക്ക് 2.30ന് മാമ്പഴക്കര ജങ്ഷനു സമീപത്ത് നെയ്യാറ്റിന്‍കര എക്‌സൈസ് സര്‍ക്കിള്‍ ഇന്‍സ്‌പെക്ടര്‍ വി.രാജാസിങിന്റെ നേതൃത്വത്തില്‍ നടത്തിയ വാഹന പരിശോധനയിലാണ് യുവാക്കള്‍ പിടിയിലായത്.
ഇവര്‍ കഞ്ചാവ് കടത്തുവാന്‍ ഉപയോഗിച്ച റോയല്‍ എന്‍ഫീല്‍ഡ് ബൈക്ക്, ഇരുപതിനായിരം രൂപ വിലവരുന്ന ടാബ്, മൊബൈല്‍ ഫോണ്‍ എന്നിവയും കണ്ടെടുത്തു. പ്രതികളെ അറസ്റ്റ് ചെയ്ത് കോടതിയില്‍ ഹാജരാക്കി. എക്‌സൈസ് ഇന്‍സ്‌പെക്ടര്‍ പി.എല്‍ ഷിബു, അസി. എക്‌സൈസ് ഇന്‍സ്‌പെക്ടര്‍ എം.എസ് മോഹന്‍രാജ്, സിവില്‍ എക്‌സൈസ് ഓഫിസര്‍മാരായ വിജേഷ്, സുബാഷ്, ഹരികുമാര്‍, അനീഷ്‌കുമാര്‍ എന്നിവര്‍ പങ്കെടുത്തു.