കടുത്തുരുത്തി: അപകടത്തില്‍പെട്ട വാഹനങ്ങള്‍ പാല്‍ത്തില്‍ നിര്‍ത്തിയിട്ട ശേഷം ഡ്രൈവര്‍മാര്‍ തമ്മിലുണ്ടായ വാക്കേറ്റത്തെ തുടര്‍ന്ന് ആപ്പാഞ്ചിറ റെയില്‍വേ മേല്‍പാലത്തില്‍ വാഹനഗതാഗതം തടസപെട്ടു. ഇന്നലെ ഉച്ചയോടെയാണ് സംഭവം. മുന്നില്‍പോയ കാറിന്റെ പിന്നില്‍ ടെംബോ ട്രാവലര്‍ ഇടിച്ചാണ് അപകടമുണ്ടായത്. ഇതോടെ കാറിന്റെ ഡ്രൈവര്‍ വാഹനം പാലത്തില്‍ നിര്‍ത്തിയിട്ട ശേഷം ടെംബോ ട്രാവലറിന്റെ ഡ്രൈവറുമായി വാക്കേറ്റം ആരംഭിച്ചു. പാലത്തില്‍ വാഹനങ്ങള്‍ നിര്‍ത്തിയിട്ട് ഇരുവരും തമ്മിലുള്ള വഴക്ക് രൂക്ഷമായതോടെ ഇതുവഴിയുള്ള വാഹനഗതാഗതം തടസപെട്ടു. പിന്നീട് നാട്ടുകാര്‍ പ്രശ്‌നത്തില്‍ ഇടപെടുകയും വാഹനങ്ങള്‍ പാലത്തില്‍ നീക്കം ചെയ്യാന്‍ ആവശ്യപെടുകയുമായിരുന്നു. ഇതോടെയാണ് വാഹനങ്ങള്‍ പാലത്തില്‍ നിന്നും നീക്കം ചെയ്യാന്‍ ഡ്രൈവര്‍മാര്‍ തയാറായത്.