വടക്കാഞ്ചേരി: മുളങ്കുന്നത്ത് കാവ് മെഡിക്കല്‍ കോളജ് ക്യാംപസില്‍ തുടര്‍ച്ചയായുണ്ടാകുന്ന അഗ്‌നിബാധകള്‍ വലിയ ഭീതി സൃഷ്ടിക്കുന്നു. ഭാഗ്യം കൊണ്ട് മാത്രമാണ് പലപ്പോഴും വന്‍ അപകടങ്ങള്‍ ഒഴിവാക്കുന്നത്. തീ പിടുത്തങ്ങള്‍ തുടര്‍ക്കഥയാകുമ്പോഴും അത് ഇല്ലാതാക്കാന്‍ അധികൃതരുടെ ഭാഗത്ത് നിന്ന് ഒരു നടപടിയും ഉണ്ടാകുന്നില്ലെന്ന ആരോപണവും ശക്തമാണ്. ഇന്നലെ അഡ്മിനിസ്‌ടേറ്റീവ് ഓഫിസിന് മുന്നിലെ ഏഴ് ഏക്കറോളം സംരക്ഷിത വനം പൂര്‍ണമായും കത്തിനശിച്ചു. രണ്ടാഴ്ച്ച മുമ്പ് വെച്ചു പിടിപ്പിച്ച രണ്ടായിരത്തോളം വൃക്ഷ തൈകളാണ് കത്തിയമര്‍ന്നത്. അതിനിടെ തുടര്‍ച്ചയായുണ്ടാകുന്ന അഗ്‌നിബാധകളെ കുറിച്ച് അന്വേഷണം നടത്തണമെന്ന ആവശ്യം ശക്തമായിട്ടുണ്ട്.