മാഡ്രിഡ്: സ്വന്തം തട്ടകമായ സാന്റിയാഗോ ബെര്‍ണാബുവില്‍ തലയുയര്‍ത്തി നിന്നത് റയല്‍ മാഡ്രിഡ് തന്നെ. വമ്പന്‍ താരങ്ങളുമായി യുവേഫ ചാംപ്യന്‍സ് ലീഗ് പോരാട്ടത്തിനായി മാഡ്രിഡിലെത്തിയ ഫ്രഞ്ച് കരുത്തരായ പാരിസ് സെന്റ് ജെര്‍മെയ്‌നെ പ്രീ ക്വാര്‍ട്ടറിന്റെ ആദ്യ പാദത്തില്‍ 3-1ന് വീഴ്ത്തി റയല്‍ മാഡ്രിഡ് പ്രതീക്ഷ കാത്തു. ഇതോടെ ആവേശപ്പോരാട്ടത്തിന്റെ രണ്ടാം പാദം മറ്റൊരു തീപ്പാറും മത്സരമായി മാറുമെന്ന് ഉറപ്പായി. ആര് നില്‍ക്കും ആര് പുറത്താകുമെന്ന് പാരിസില്‍ തീരുമാനമാകും. മറ്റൊരു മത്സരത്തില്‍ പോര്‍ച്ചുഗല്‍ ടീം പോര്‍ട്ടോയെ അവരുടെ തട്ടകത്തില്‍ കയറി അഞ്ച് ഗോളുകള്‍ അടിച്ചൂകൂട്ടി തകര്‍ത്ത് ഉജ്ജ്വല വിജയം പിടിച്ച് ലിവര്‍പൂള്‍ ക്വാര്‍ട്ടറിന്റെ വക്കിലെത്തി.

അസന്‍സിയോ ഇംപാക്റ്റ്

മത്സരത്തിന് മുന്‍പ് പി.എസ്.ജി ഉയര്‍ത്തിയ കനത്ത വെല്ലുവിളി, ലോകം മുഴുവന്‍ ആകാംക്ഷയോടെ കാണുന്നതിന്റെ സമ്മര്‍ദ്ദം, മത്സരം തുടങ്ങി ഒരു ഗോളിന് പിന്നിലായിപ്പോയതിന്റെ നിരാശ തുടങ്ങി ഒന്നിലേറെ പ്രശ്‌നങ്ങളെ സൂപ്പര്‍ താരം ക്രിസ്റ്റ്യാനോ റൊണാള്‍ഡോ നേടിയ ഇരട്ട ഗോളിന്റെ മികവില്‍ മറികടന്നാണ് റയല്‍ വിജയം പിടിച്ചത്. അതേസമയം നിരാശയോടെയല്ല പി.എസ്.ജിയുടെ മടക്കം. ഒരു എവേ ഗോള്‍ വലയിലാക്കിയതിന്റെ പ്രതീക്ഷ അവര്‍ക്കും ആത്മവിശ്വാസത്തോടെ സ്വന്തം തട്ടകത്തില്‍ രണ്ടാം പാദത്തിനിറങ്ങാന്‍ കരുത്ത് നല്‍കും.
ഏതാണ്ട് തുല്ല്യ കരുത്തിലാണ് മത്സരത്തില്‍ ഇരു ടീമുകള്‍ പോരാടിയത്. പന്തടക്കത്തിലും ആക്രമണം രൂപപ്പെടുത്തുന്നതില്‍ ഇരു ടീമുകളും ഒപ്പത്തിനൊപ്പം നിന്നു. അതേസമയം ലക്ഷ്യത്തിലേക്ക് ഷോട്ട് പായിക്കുന്നതില്‍ റയല്‍ മുന്നില്‍ നിന്നു. കളി തുടങ്ങി 33ാം മിനുട്ടില്‍ അഡ്രിയാന്‍ റാബിയോട്ടിലൂടെ പി.എസ്.ജി മുന്നിലെത്തി. താരത്തെ മാര്‍ക്ക് ചെയ്യുന്നതില്‍ റയല്‍ പ്രതിരോധ നിര പരാജയപ്പെട്ട തക്കം സമര്‍ഥമായി മുതലെടുത്താണ് റാബിയോട്ട് വല കുലുക്കിയത്. ഒരു ഗോളിന്റെ കടവുമായി കളി തുടര്‍ന്ന റയലിന് തിരിച്ചുവരാനുള്ള അവസരം പെനാല്‍റ്റിയിലൂടെ 45ാം മിനുട്ടില്‍ ലഭിച്ചു. ടോണി ക്രൂസിനെ ബോക്‌സില്‍ വീഴ്ത്തിയതിന് ലഭിച്ച പെനാല്‍റ്റി സൂപ്പര്‍ താരം ക്രിസ്റ്റ്യാനോ റൊണാള്‍ഡോ വലയിലാക്കി റയലിന് സമനിലയൊരുക്കി.
രണ്ടാം പകുതിയില്‍ ആക്രമണം കടുപ്പിച്ച പി.എസ്.ജിയെ പക്ഷേ ഗോളടിക്കാന്‍ അനുവദിക്കാതെ പിടിച്ചു നിര്‍ത്തിയ റയല്‍ കളിയുടെ അവസാന പത്ത് മിനുട്ടിലാണ് ശേഷിച്ച രണ്ട് ഗോളുകളും വലയിലാക്കി ഉജ്ജ്വല തിരിച്ചുവരവ് നടത്തിയത്. കൃത്യമായി പറഞ്ഞാല്‍ 79ാം മിനുട്ടില്‍ ഇസ്‌കോയെ പിന്‍വലിച്ച് അസന്‍സിയോയെ കളത്തിലിറക്കി റയല്‍ കോച്ച് സിദാന്‍ നടത്തിയ തന്ത്രം മത്സരത്തിന്റെ ഗതി തന്നെ മാറാന്‍ കാരണമായി. 83ാം മിനുട്ടില്‍ ക്രിസ്റ്റ്യാനോ റൊണാള്‍ഡോ തന്റെ രണ്ടാം ഗോളിലൂടെ റയലിനെ മുന്നിലെത്തിച്ചു. മൂന്ന് മിനുട്ടിനുള്ളില്‍ മാഴ്‌സലോയുടെ ഗോളും വലയിലായതോടെ റയല്‍ സുരക്ഷിത വിജയം ഉറപ്പാക്കി. ഈ രണ്ട് ഗോളുകളും ഒരുക്കി നല്‍കിയത് അസന്‍സിയോയുടെ മികവായിരുന്നു.

മാനെ ഹാട്രിക്കില്‍ ലിവര്‍പൂള്‍

സാദിയോ മാനെ നേടിയ ഹാട്രിക്ക് ഗോളുകളുടെ മികവാണ് പോര്‍ട്ടോയെ അവരുടെ തട്ടകത്തില്‍ മറുപടിയില്ലാത്ത അഞ്ച് ഗോളുകള്‍ക്ക് തകര്‍ക്കാന്‍ ലിവര്‍പൂളിന് തുണയായത്. മത്സരത്തിന്റെ ഒരു ഘട്ടത്തിലും പോര്‍ട്ടോയ്ക്ക് കാര്യമായ മുന്നേറ്റങ്ങളൊന്നും സൃഷ്ടിക്കാന്‍ അവസരം നല്‍കാതെ പഴുതടച്ച ആക്രമണമാണ് ലിവര്‍പൂള്‍ നടത്തിയത്. ആദ്യ പകുതിയില്‍ രണ്ടും രണ്ടാം പകുതിയില്‍ മൂന്നും ഗോളുകളാണ് പോര്‍ട്ടോ വാങ്ങിക്കൂട്ടിയത്. 25, 53, 85 മിനുട്ടുകളിലാണ് മാനെ വല ചലിപ്പിച്ചത്. ശേഷിച്ച ഗോളുകള്‍ മുഹമ്മദ് സലാഹ് 29ാം മിനുട്ടിലും റോബര്‍ട്ടോ ഫിര്‍മിനോ 69ാം മിനുട്ടിലും നേടി. മികച്ച വിജയത്തോടെ ക്വാര്‍ട്ടര്‍ പ്രവേശം ഏതാണ്ടുറപ്പിച്ച ലിവര്‍പൂളിന് സ്വന്തം തട്ടകത്തില്‍ നടക്കുന്ന രണ്ടാം പാദ പോരാട്ടത്തിന് വേവലാതികളില്ലാതെ ഇറങ്ങാനുള്ള ആവേശവും നല്‍കുന്നതാണ് മത്സര ഫലം.