കാസര്‍കോട്: ജില്ലയിലെ ഏക പൊതുമേഖല വ്യവസായ സ്ഥാപനമായിരുന്ന കെല്‍ സംയുക്ത സംരംഭമാക്കി ഭെല്ലിനു കൈമാറി ആറു വര്‍ഷമായിട്ടും ഒരു നയാ പൈസപ്പോലും നിക്ഷേപം വന്നില്ലെന്നു എസ്.ടി.യു. ഇത്രയും കാലം കൊണ്ട് കമ്പനി നവീകരിക്കാനോ ജീവനക്കാരുടെ അനുകൂല്യങ്ങള്‍ നല്‍കാനോ തയാറാകാത്ത ഭെല്‍ അധികൃതരുടെ നടപടിക്കെതിരേ പരക്കെ വിമര്‍ശനമുയരുന്നു. കേന്ദ്ര സര്‍ക്കാരും കമ്പനി കൈമാറിയ ഇടതുസര്‍ക്കാറും നിസംഗത വെടിഞ്ഞു വ്യവസായ സ്ഥാപനത്തേയും ജീവനക്കാരേയും സംരക്ഷിക്കാന്‍ ആവശ്യമായ നടപടി സ്വീകരിക്കണമെന്ന് എസ്.ടി.യു ദേശീയ സെക്രട്ടറി എ അബ്ദുല്‍ റഹ്മാന്‍ ആവശ്യപ്പെട്ടു.
കമ്പനിയെ കൈയൊഴിയാന്‍ തീരുമാനിച്ചെന്നു കേരള സര്‍ക്കാറിനെ അറിയിച്ച് മൗനം പാലിച്ചിരിക്കുന്ന ഭെല്‍ അധികൃതര്‍ ജീവനക്കാരുടെയും കുടുംബാംഗങ്ങളുടെയും ജീവിതമാണ് അനിശ്ചിതത്വത്തിലാക്കിയിരിക്കുന്നത്. ജില്ലാ പഞ്ചായത്തും ജില്ലാ വികസന സമിതിയും ജില്ലയിലെ മറ്റു തദ്ദേശസ്വയംഭരണ സ്ഥാപനങ്ങള്‍ പ്രമേയങ്ങള്‍ വഴിയും രാഷ്ട്രീയ തൊഴിലാളി സംഘടനകള്‍ സമരങ്ങള്‍ നടത്തിയും സ്ഥാപനത്തെയും ജീവനക്കാരെയും രക്ഷിക്കണമെന്നാവശ്യപ്പെട്ടിട്ടും ഇക്കാര്യത്തില്‍ ഇടത് സര്‍ക്കാര്‍ പുലര്‍ത്തുന്ന അനാസ്ഥ അവസാനിപ്പിക്കണമെന്നും അദ്ദേഹം പറഞ്ഞു.