ചാംപ്യന്‍സ് ലീഗിന്റെ ഗ്രൂപ്പ് ഘട്ടത്തില്‍ പാരിസ് സെന്റ് ജെര്‍മെയ്‌നോട് പരാജയപ്പെട്ടതിന് പിന്നാലെ പരിശീലക സ്ഥാനം നഷ്ടപ്പെട്ട കാര്‍ലോസ് ആന്‍സലോട്ടിക്ക് പകരം ജുപ് ഹെയ്‌നെക്‌സ് പരിശീലക സ്ഥാനത്ത് തിരിച്ചെത്തിയ ശേഷം മിന്നും കുതിപ്പാണ് ബയേണ്‍ മ്യൂണിക്ക് നടത്തുന്നത്. അവരെ ചാംപ്യന്‍സ് ലീഗ് കിരീടത്തിലേക്ക് നയിച്ച പരിശീലകന്‍ കൂടിയായ ഹെയ്‌നെക്‌സിന്റെ കീഴില്‍ ബുണ്ടസ് ലീഗയില്‍ മികച്ച ഫോമിലാണ് ബാവേറിയന്‍സ്. സ്വന്തം തട്ടകത്തില്‍ ബെസിക്റ്റസിന്റെ ദൗര്‍ബല്യം സമര്‍ഥമായി മുതലെടുത്ത് ക്വാര്‍ട്ടര്‍ പ്രതീക്ഷ ആദ്യ പാദത്തില്‍ തന്നെ ശക്തമാക്കി നിര്‍ത്തുകയാവും ബയേണ്‍ ലക്ഷ്യമിടുന്നത്. ലെവന്‍ഡോസ്‌കി, മുള്ളര്‍, ജെയിംസ് റോഡ്രിഗസ് തുടങ്ങിയ താരങ്ങളുടെ മികച്ച ഫോമിലാണ് ബാവേറിയന്‍സിന്റെ പ്രതീക്ഷകള്‍.
തുര്‍ക്കി ക്ലബ് ബെസിക്റ്റസ് ഇന്ന് കരുതലോടെയാകും അലയന്‍സ് അരീനയില്‍ മത്സരിക്കാനിറങ്ങുക. തുര്‍ക്കിഷ് സൂപ്പര്‍ ലിഗില്‍ നിലവില്‍ നാലാം സ്ഥാനത്താണ് ടീം നില്‍ക്കുന്നത്. കരുത്തരായ എതിരാളികള്‍ക്കെതിരേ എവേ പോരാട്ടത്തില്‍ ഒരു ഗോളെങ്കിലും അടിച്ച് നിലനില്‍പ്പ് പ്രതീക്ഷകള്‍ സജീവമാക്കുകയാണ് ടീം സ്വപ്നം കാണുന്നത്.