കൊച്ചി: കൊച്ചി ഫോട്ടോ ജേര്‍ണലിസ്റ്റ് ഫോറത്തിന്റെ സി.കെ ജയകൃഷ്ണന്‍ ന്യൂസ് ഫോട്ടോഗ്രാഫി പുരസ്‌കാര സമിതിയുടെ പ്രത്യേക പരാമര്‍ശം സുപ്രഭാതം ഫോട്ടോഗ്രാഫര്‍ നിധീഷ് കൃഷ്ണന്. കോഴിക്കോട് ബ്യൂറോയിലെ ഫോട്ടോഗ്രാഫറാണ് നിധീഷ്. 10,000 രൂപയും പ്രശസ്തി പത്രവും ശില്‍പവും ഉള്‍പ്പെട്ട സി.കെ ജയകൃഷ്ണന്‍ ന്യൂസ് ഫോട്ടോഗ്രാഫി പുരസ്‌കാരത്തിന് മലയാള മനോരമയിലെ എം.ടി വിധുരാജ് അര്‍ഹനായി. ന്യൂ ഇന്ത്യന്‍ എക്‌സ്പ്രസിലെ മില്‍ട്ടണ്‍ ആന്റണിയും പ്രത്യേക പരാമര്‍ശം നേടി. എന്‍.എസ് മാധവന്‍, ഡോ. സെബാസ്റ്റിയന്‍ പോള്‍, രാജന്‍ പോള്‍ എന്നിവര്‍ ഉള്‍പ്പെട്ട ജൂറിയാണ് പുരസ്‌കാര ജേതാക്കളെ തിരഞ്ഞെടുത്തത്.
ഓള്‍ കേരള ഗ്രീന്‍കെയര്‍ മിഷന്‍ പുരസ്‌കാരം, ട്രിവാന്‍ഡ്രം ഫോട്ടോഗ്രാഫേഴ്‌സ് ഫോറം സ്ട്രീറ്റ് ഫോട്ടോഗ്രാഫര്‍ പുരസ്‌കാരം എന്നിവ നേടിയിട്ടുണ്ട് നിധീഷ്. കോഴിക്കോട് കല്ലായി കൃഷ്ണഗിരിയില്‍ പരേതനായ കൃഷ്ണന്റെയും ഗിരിജയുടെയും മകനാണ്. ഭാര്യ: രേഷ്മ. മക്കള്‍: യാഷ്‌വി, തന്‍വി. ദര്‍ബാര്‍ ഹാള്‍ ആര്‍ട് ഗ്യാലറിയില്‍ നടക്കുന്ന കൊച്ചി ഫോട്ടോ ജേര്‍ണലിസ്റ്റ് ഫോറത്തിന്റെ പോര്‍ട്ടോഫോളിയോ 2018 ഫോട്ടോ പ്രദര്‍ശനത്തിന്റെ ഭാഗമായി നാളെ വൈകിട്ട് അഞ്ചിന് നടക്കുന്ന ചടങ്ങില്‍ പുരസ്‌കാരങ്ങള്‍ വിതരണം ചെയ്യും.