വിഗാന്‍: ഇംഗ്ലീഷ് പ്രീമിയര്‍ ലീഗിലും ചാംപ്യന്‍സ് ലീഗിലും അപരാജിത മുന്നേറ്റം തുടരുന്ന മാഞ്ചസ്റ്റര്‍ സിറ്റിയെ എഫ്.എ കപ്പില്‍ നിന്ന് പുറത്താക്കി വിഗാന്‍ അത്‌ലറ്റിക് ക്ലബ് ക്വാര്‍ട്ടറില്‍ പ്രവേശിച്ചു. 79ാം മിനുട്ടില്‍ വില്‍ ഗ്രിഗ് നേടിയ ഗോളിലാണ് ഇംഗ്ലണ്ടിലെ മൂന്നാം ഡിവിഷന്‍ ക്ലബായ വിഗാന്‍ മാഞ്ചസ്റ്റര്‍ സിറ്റിയെ സ്വന്തം മൈതാനത്ത് നിന്ന് അടിച്ചോടിച്ചത്. എതിരില്ലാത്ത ഒരു ഗോളിനാണ് വിഗാന്റെ വിജയം. മുന്‍നിര താരങ്ങളെ ഇറക്കിയിട്ടും വിഗാനോടേറ്റ പരാജയം സിറ്റിക്ക് ചീത്തപ്പേരുണ്ടാക്കിയെന്നതില്‍ സംശയമില്ല. ഇത് മൂന്നാം തവണയാണ് വിഗാന്‍ സിറ്റിയെ എഫ്.എ കപ്പില്‍ നിന്ന് പുറത്താക്കുന്നത്. ലോകത്തിലെ ഏറ്റവും വിലപിടിപ്പുള്ള താരങ്ങളുമായിറങ്ങിയ സിറ്റി വിഗാന്‍ ഗോള്‍മുഖത്തേക്ക് നിരന്തരം അക്രമണം അഴിച്ചുവിട്ടെങ്കിലും ഗോള്‍ മാത്രം അകന്നുനിന്നു. മത്സരത്തിന്റെ 82 ശതമാനവും പന്ത് കൈവശം വച്ച സിറ്റി വിഗാന്‍ പോസ്റ്റിലേക്ക് അഞ്ചു തവണ നിറയൊഴിച്ചെങ്കിലും ഗോള്‍കീപ്പര്‍ വാള്‍ട്ടന്റെ ഉജ്ജ്വല സേവുകള്‍ വിഗാന് രക്ഷയായി.