ഷൊര്‍ണൂര്‍: അടച്ചുപൂട്ടല്‍ ഭീഷണി നേരിടുന്ന ഷൊര്‍ണൂര്‍ ഉപജില്ലയിലെ ഷൊര്‍ണൂര്‍ ചുഡുവാലത്തൂര്‍ എസ്.ആര്‍.എല്‍.പി സ്‌കൂളില്‍ പുതിയ അധ്യയനവര്‍ഷത്തില്‍ മൂന്നുകുട്ടികള്‍ അഡ്മിഷന്‍ നേടി. കഴിഞ്ഞ വര്‍ഷം സ്‌കൂളിലെ പ്രധാനാധ്യാപിക കാലാവധി പൂര്‍ത്തിയായി വിരമിച്ചു. പകരം റഷീദ എന്ന അധ്യാപിക സ്‌കൂളില്‍ ഉണ്ട്. എട്ട് പതിറ്റാണ്ട് ഷൊര്‍ണൂരിന്റെ വിദ്യാഭ്യാസ യശ്ശസ്സ് ഉയര്‍ത്തിപ്പിടിച്ചിരുന്ന ഈ സ്‌കൂള്‍ ഇംഗ്ലീഷ് മീഡിയം, സി.ബി.എസ്.ഇ എന്നിവയുടെ വരവോടെ പിറകോട്ട് പോകുകയായിരുന്നു. ഒന്നുമുതല്‍ നാലു ക്ലാസ് വരെ രണ്ടും മൂന്നും ഡിവിഷന്‍വരെ ഉണ്ടായിരുന്നു.
സമീപപ്രദേശങ്ങളില്‍ യു.പി.സ്‌കൂളും ഹൈസ്‌കൂളും വര്‍ദ്ധിച്ചതും ഈ സ്‌കൂളിന്റെ പതനത്തിന് ആക്കം കൂട്ടി. വിദ്യാര്‍ത്ഥികള്‍ ഇല്ലാത്തതുമൂലം ഷൊര്‍ണൂര്‍ ഉപജില്ലയില്‍ത്തന്നെ അടച്ചുപൂട്ടല്‍ ഭീഷണി നേരിടുന്ന സ്‌കൂളുകള്‍ നിരവധിയാണ്. സ്‌കൂളില്‍ ഇംഗ്ലീഷ് മീഡിയം ക്ലാസുകള്‍ ആരംഭിച്ചാല്‍ വിദ്യാര്‍ത്ഥികളെ കിട്ടുമെന്ന് ബന്ധപ്പെട്ടവര്‍തന്നെ ചൂണ്ടിക്കാണിക്കപ്പെടുന്നു.