കൊണ്ടോട്ടി: കേരളത്തില്‍ നിന്നുള്ള ഹജ്ജ് വിമാന സര്‍വിസുകള്‍ ഇത്തവണയും സഊദി എയര്‍ലൈന്‍സിന്.
ഹജ്ജ് സര്‍വിസിന് രാജ്യത്തെ 20 ഹജ്ജ് എംബാര്‍ക്കേഷന്‍ പോയിന്റുകളിലേക്ക് കേന്ദ്ര വ്യോമയാന മന്ത്രാലയം ക്ഷണിച്ച ടെന്‍ഡറുകളില്‍ നെടുമ്പാശ്ശേരി ഉള്‍പ്പെടെ ഏഴുപോയിന്റുകളില്‍ നിന്നാണ് സഊദി എയര്‍ലൈന്‍സ് ഈ വര്‍ഷം ഹജ്ജ് സര്‍വിസ് നടത്തുക.
ഡല്‍ഹി, അഹമ്മദാബാദ്, ലക്‌നൗ, ബംഗളൂരു, ജയ്പൂര്‍, ഹൈദരാബാദ് എന്നിവിടങ്ങളിലാണ് സഊദിയുടെ മറ്റു ഹജ്ജ് സര്‍വിസുകള്‍. മുന്‍വര്‍ഷങ്ങളിലും സഉദി എയര്‍െലെന്‍സിനാണ് കേരളത്തില്‍ നിന്നുള്ള ഹജ്ജ് ടെന്‍ഡര്‍ ലഭിച്ചിരുന്നത്. 21 വരെയായിരുന്ന വിമാന കമ്പനികളില്‍നിന്ന് ഹജ്ജ് ടെന്‍ഡര്‍ ക്ഷണിച്ചിരുന്നത്. ഇന്നലെ വൈകിട്ടാണ് ടെന്‍ഡര്‍ തുറന്നത്.
കേരളത്തിലെ ഹജ്ജ് സര്‍വിസുകള്‍ നെടുമ്പാശ്ശേരിയില്‍നിന്ന് ജൂലൈ 29 മുതല്‍ ഓഗസ്റ്റ് 15 വരെയാണ് ക്രമീകരിച്ചിരിക്കുന്നത്. നെടുമ്പാശ്ശേരിയില്‍നിന്ന് സഊദി എയര്‍ലെന്‍സ് നേരിട്ട് ജിദ്ദയിലേക്കായിരിക്കും തീര്‍ത്ഥാടകരുമായി പുറപ്പെടുക.
എന്നാല്‍ ഹജ്ജ് കഴിഞ്ഞുള്ള മടക്കസര്‍വിസ് മദീനയില്‍ നിന്നായിരിക്കും നെടുമ്പാശ്ശേരിയിലേക്ക് പുറപ്പെടുക. സെപ്റ്റംബര്‍ 5 മുതല്‍ 15 വരെയാണ് മടക്ക സര്‍വിസുകള്‍ ക്രമീകരിച്ചിരിക്കുന്നത്.