ഡല്‍ഹി: ഇന്ത്യന്‍ സൂപ്പര്‍ ലീഗ് പോരാട്ടത്തില്‍ ഡല്‍ഹി ഡൈനാമോസിന് വമ്പന്‍ ജയം. സ്വന്തം തട്ടകത്തില്‍ അവര്‍ മുംബൈ സിറ്റി എഫ്.സിയെ 5-1ന് തകര്‍ത്തു. അഞ്ചാം മിനുട്ടില്‍ നന്ദകുമാര്‍ നേടിയ ഗോളില്‍ മുന്നില്‍ കടന്ന ഡല്‍ഹിയെ 49ാം മിനുട്ടില്‍ എവര്‍ട്ടന്‍ സാന്റോസിലൂടെ മുംബൈ സമനിലയില്‍ തളച്ചു. എന്നാല്‍ മത്സരം സമനിലയില്‍ അവസാനിക്കുമെന്ന് തോന്നിച്ചെങ്കിലും പിന്നീടാണ് ഗോളുകളുടെ പ്രളയം കണ്ടത്. 73ാം മിനുട്ടില്‍ മത്യാസ് മിര്‍ബജെ, 81ല്‍ മാനുവല്‍ അരന, 84ല്‍ കാലു ഉച്ചെ, ഇഞ്ച്വറി ടൈമില്‍ ലാലിന്‍സ്വല ചങ്‌തെ എന്നിവര്‍ തുടര്‍ ഗോളുകളുമായി മുംബൈയെ മുക്കി കളഞ്ഞു. നാടകീയ പോരാട്ടത്തില്‍ ഡല്‍ഹി താരം പ്രതിക് ചൗധരിയും മുംബൈ താരം സഹില്‍ ടവോരയും ചുവപ്പ് കാര്‍ഡ് കണ്ട് പുറത്തായി.
മുംബൈ ഡല്‍ഹിയോട് പരാജയപ്പെട്ടതോടെ ചെന്നൈയിന്‍ എഫ്.സി സെമി ബര്‍ത്ത് ഉറപ്പാക്കി. ശേഷിക്കുന്ന ഒരു സ്ഥാനത്തേക്ക് ജംഷഡ്പൂര്‍, ഗോവ ടീമുകള്‍ക്കും സാധ്യത നിലനില്‍ക്കുമ്പോള്‍ കേരള ബ്ലാസ്റ്റേഴ്‌സിന് നേരിയ പ്രതീക്ഷയും ബാക്കിയുണ്ട്.