ക്വലാലംപുര്‍: മലേഷ്യയില്‍ നടക്കുന്ന സുല്‍ത്താന്‍ അസ്‌ലന്‍ ഷാ കപ്പ് ഹോക്കി ടൂര്‍ണമെന്റില്‍ ആദ്യ മത്സരത്തില്‍ തന്നെ ഇന്ത്യക്ക് പരാജയം. അര്‍ജന്റീനയോടാണ് 2-3 എന്ന സ്‌കോറിന് ഇന്ത്യ പരാജയപ്പെട്ടത്. ലോക രണ്ടാം നമ്പര്‍ ടീമും ഒളിമ്പിക്‌സ് ജേതാക്കളുമായ അര്‍ജന്റീനയുമായി ഇന്ത്യ മികച്ച പോരാട്ടം പുറത്തെടുത്തെങ്കിലും വിജയിക്കാനായില്ല.
മൂന്നാം ക്വാര്‍ട്ടര്‍ വരെ 2-3 എന്ന നിലയിലായിരുന്നു സ്‌കോര്‍. പ്രതികൂല കാലാവസ്ഥ കാരണം നാലാം ക്വാര്‍ട്ടര്‍ താമസിച്ചാണ് തുടങ്ങിയത്. നാലാം ക്വാര്‍ട്ടറില്‍ ഇന്ത്യക്ക് കാര്യമായൊന്നും ചെയ്യാനാവാതിരുന്നത് കാരണം വിജയം കൈവിട്ട് പോവുകയായിരുന്നു. 13ാം മിനുട്ടില്‍ ഗോണ്‍സാലോ പോയിലാട്ടാണ് അര്‍ജന്റീനക്കായി ആദ്യ ഗോള്‍ നേടിയത്. 24ാം മിനുട്ടില്‍ കൊയ്‌ലാട്ടിന്റെ രണ്ടാം ഗോളും വന്നതോടെ ഇന്ത്യ രണ്ട് ഗോളിന് പിറകിലായി. തൊട്ടടുത്ത മിനുട്ടില്‍ തന്നെ അമിത് രോഹിദാസ് ഇന്ത്യക്കായി ഗോള്‍ മടക്കി.
രണ്ടാം ക്വാര്‍ട്ടര്‍ അവസാനിച്ചപ്പോള്‍ ഒരു ഗോളിന് പിറകിലായിരുന്നു ഇന്ത്യ. മൂന്നാം ക്വാര്‍ട്ടറിന്റെ തുടക്കത്തില്‍ ഇന്ത്യക്കായി രോഹിദാസ് സമനില ഗോള്‍ നേടി. മൂന്നാമതും അര്‍ജന്റീനക്കായി പൊയിലാട്ട് ലക്ഷ്യം കണ്ടതോടെ ഇന്ത്യ ഒരു ഗോളിന് പിറകിലായി. നാലാം ക്വാര്‍ട്ടറില്‍ ഗോള്‍ മടക്കാനാകാതെ വന്നതോടെ ആദ്യ മത്സരത്തില്‍ തന്നെ പരാജയം ഏറ്റുവാങ്ങി ഇന്ത്യ കളം വിട്ടു. ഇന്ന് നടക്കുന്ന രണ്ട് മത്സരങ്ങളില്‍ ഇംഗ്ലണ്ടുമായും അയര്‍ലന്റുമായും ഇന്ത്യ ഏറ്റുമുട്ടും.