ഗൂഡല്ലൂര്‍: നീലഗിരി ജില്ലയിലെ മുതുമല കടുവ സങ്കേതം കൂടുതല്‍ വനപ്രദേശങ്ങള്‍ ഉള്‍പ്പെടുത്തി വിസ്തൃതി കൂട്ടുന്നു. ഊട്ടി, ഗൂഡല്ലൂര്‍ താലൂക്കുകളിലെ തെക്കുവടക്ക് വനമേഖലകള്‍ ഉള്‍പ്പെടുന്നതാണ് കടുവാ സങ്കേതം. ഇതില്‍ ഊട്ടി ഡിവിഷനിലെ സീഗൂര്‍, തെങ്കുമറാട്ട, സിങ്കാര എന്നീ റെയ്ഞ്ചുകളിലെ 367 ച.കി.മീറ്റര്‍ ഏപ്രില്‍ ഒന്നുമുതല്‍ വനപ്രദേശം സങ്കേതത്തോട് ചോര്‍ക്കാനുള്ള നീക്കമാണ് നടക്കുന്നത്. ഇതിന്റെ പ്രവര്‍ത്തനങ്ങള്‍ അന്തിമഘട്ടത്തിലാണ്. ഈ വനപ്രദേശങ്ങള്‍ കൂടി ചേര്‍ക്കുന്നതോടെ സങ്കേതത്തിന്റെ വിസ്തൃതി 321 ച.കി.മീറ്ററില്‍ നിന്ന് 688 ച.കി.മീറ്ററായി ഉയരും. വിസ്തൃതി കൂടുന്നതോടെ മസിനഗുടി കേന്ദ്രമായി പുതിയ ആസ്ഥാനം സ്ഥാപിച്ച് ഡെപ്യൂട്ടി ഡയരക്ടറെ നിയമിക്കാനും നടപടികള്‍ പുരോഗമിക്കുകയാണ്.